Shillong, Jylliew 24
Ki pulit jong ka East Garo Hills ki la ïoh ban kurup ïa bun bah ki tiar siat bad ki kuli ha ka jingleit khynra ha ka por miet ha kawei na ki khlaw kaba rben hajan ka shnong Chikama kaba hap hapoh ka thanat Rongjeng.
Ka jingïoh kurup ïa kitei ki tiar ka la long hadien ka jingïoh ïa ka jingtip kaba bniah na ki bor syntiat, ha kaba ki pulit na thanat William-nagar bad Rongjeng ha ka jingïatreilang ryngkat hapoh ka jingïalam u Additional Superinten-dent of Police, ki la hiar ban khynra ha ka por kumba 11:30 mynmiet ha ka 23 tarik u Jylliew, 2025.
Shuh shuh la ong ba dei ha ka por kumba 2:00 baje mynstep jong ka 24 tarik mynta u bnai, kane ka kynhun ki pulit, ka la lah ban lap ïa ka jaka buhrieh ïa ki tiar siat. Kine ki tiar ba la ïoh kurup ki kynthup ïa kawei ka pistol shna hi, 212 tylli ki kuli ka AK-series kiba la suba bym pat bthei, 22 tylli ki kuli ba la suba ba ki dei ki kuli pyrshah liengsuiñ, 13 tylli ki kuli pyrshah liengsuiñ kiba la sniew, 11 tylli ki kuli ba lait, bad 52 tylli ki kuli bym pat bthei jong ka pistol 6.5 mm.
Ïa kine baroh ki tiar la kurup ha ka jingdon lang jong ki sakhi laitluid, bad ka jingtohkit kaba kham bniah ka dang ïaid mynta ban tip ïa ka tynrai bad ka jingthmu jong katei ka jingbuh mar.
U Superintendent of Police ka East Garo Hills, Bah S. A. Rynjah, MPS, u la pynthikna ïa kane ka jingïoh kurup bad pynpaw ba ka jingïoh kurup ka dei ka sienjam kaba kongsan ban khanglad ïa ki kam pyntriem kiba lah ban jia ha kane ka thaiñ.
