Guwahati, Jylliew:
Ki dkhot ka Bajrang Dal ki la pynlong ïa ka jingïakhih ha ka Lah Sngi U Blei hakhmat ka ophis jong u Deputy Commissioner bad ka Local Beat Office jong ka Bajali, Assam, da kaba dawa ban pynsangeh noh mardor ïa ki kam tih shyiap ba beain hajan ka wah Pahumara.
Ki nongïakhih ki la pynpaw ïa ka jingsngewkhia kaba jur halor ka jingtih shyiap be-aiñ khlem da tehlakam hajan ka wah Pahumara, kaba ki kam ba ka wanrah ïa ka jingjulor kaba jur ïa ka mariang ha Assam.
Ki nongïakhih ki la pynpaw ruh ïa ka jingpyrshah ïa ka jingïaid beit jong ki kali bret ñiut kiba la kit palat bad kiba pynmih ïa ka jingjaboh ha katei ka thaiñ, da kaba pynpaw ba kine ki kali kim pynjulor tang ïa ki surok hynrei ki buh ruh ïa ka jingma kaba khraw ïa ka jingshngaiñ jong ki nongshong shnong bad ki nongleit nongwan.
U Himangshu Deka, u President ka Bajrang Dal u la pynpaw kumne, “Namar ka jingbym shimkhia jong ki nongñiah kali, uwei u samla u la duh ei ïa la ka jong ka jingim hajan Kenduguri ha Jorhat, Assam, ha ka miet Sngi U Blei.
Ym don kano kano ka kyndon halor ka jingpynher stet ne ka jingkit kali palat ha katei ka thaiñ.”
Katkum ka jingong jong u Pranjit Talukdar, Vice President jong ka Bajrang Dal, ym don ba khanglad ïa ki kali kit ñiut kiba la kit palat ïa ka jingkit, bad ki riew shimet ki lum shyiap beaiñ na ka wah Pahumara. U la kynnoh shuh shuh, “Ki briew ha ka kyrteng jong ka kam khaïi ki pynjot ia ka mariang jong ngi, bad ki heh sorkar ki kyrshan ïa ka.”
Ki dkhot jong ka Bajrang Dal ki la aiti ïa ka dorkhas ka bor pynïaid distrik, da kaba kyntu ban pynjari pyrkhing ïa ki kyndon tih marpoh khyndew, ban jurip man ka por ïa ki kali kiba kit palat pud, bad ban pynshitom ïa kito kiba pynkheiñ ïa ki kyndon jong ka mariang.
Ki nongshong shnong ki la pynpaw slem bha ïa ka jingsngewkhia jong ki halor ka jingpynjot ïa ka mariang jong ka wah Pahumara, bad kane ka jingïakhih ka pyni ïa ka jingbitar jong ki paidbah kaba nang jur halor ka jingbym leh eiei jong ki bor synshar.
