Shillong, Jylliew 24
U Myntri Rangbah ka Jylla, Conrad K Sangma u la kyntu ïa ki seng saiñ pyrthei ba kin pyrkhat biang halor ka rai ba ki la shim bad ban ïashimbynta ha ka jingïalang jong ka All Party Committee (APC) ban ïakren ïa ka mat halor ka jingthmu ban pyntreikam ïa ka projek rel hapoh ka Rilum Khasi bad Jaiñtia.
Haba ïakren bad ki lad pathai khubor ha ka Sngi Ba-ar, u Conrad u la ong, ka jingshim rai dang shen jong ki seng saiñ pyrthei kiba don ha ka Liang Pyrshah kata ka VPP bad Congress ban ym ïashimbynta ha ka jingïalang ka la phah ïa ka khubor kaba bakla ha ka kam synshar paidbah.
“Ngi la ïoh ïa ki jingpynsngew kiba long pyrshah na ki katto-katne ki seng saiñ pyrthei, kumta ngim shym la pynïaid sted shuh ïa ka kam. Ka mat ka jong nga ka long, lada phi mynjur ne phim mynjur ruh hynrei ngi dei ban ïa shong bad ai lem ïa ki jingmut jingpyrkhat bad ïa ki jingai jingmut ha ka miej,” u la ong.
“Ngi kwah ban ïohi ïa baroh ki seng saiñ pyrthei, namar ka dei ka mat kaba kongsan. Kumta lada mynjur ne ym mynjur ruh kaba donkam ka long ba ngin shong ban ïakren ha ka miej,” la ong u Conrad.
U Myntri Rangbah u la banjur ïa ka jingkongsan ban don ïa ka jingïakren bad ka lynti ha ka kam synshar paidbah ha kaban wad ïa ka lynti ban ïaid shakhmat.
U Conrad u la kyntu ïa ki seng ha ka Liang Pyrshah ban pyrkhat biang ïa ka rai kaba ki la shim bad ban ïashimbynta ha katei ka jingïalang.
“Nga don jingkyrmen ba ki seng saiñ pyrthei kin pyrkhat biang ïa ka rai kaba ki la shim bad ngin sa pynbeit pat ïa ka tarik. Lada katei kam lah ban jia, kumta shen ngin sa hap ban pynbeit noh ïa ka tarik,” la bynrap u Myntri Rangbah.
