Shillong, Jylliew 24
Ki MDC ka Liang Pyrshah kiba kynthup na ka NPP, UDP, HSPDP bad MDC shimet ki la mih jyndat na ïingdorbar ha Khasi Hills Autono-mous District Council (KHADC) kaba la long ha ka Sngi Ba-ar, ka 24 tarik Jylliew 2025 hadien ba ka Executive Committee ba la ïalam da ka VPP ka la ïaid shakhmat ban wanrah ïa ka mang tyngka jong u snem 2025-26.
Kane ka jingmih jyndat ki MDC ka Liang Pyrshah hapoh ka jingïa-lam u Bah Titosstarwell Chyne kum u nongïalam ka dei namar ki pyrshah ban wanrah ïa ka mang tyngka bynrap ne ka ‘supplementary budget’ namar ki kwah ban pyndep shwa ïa ka mang tyngka kaba pura.
Ha ka dorbar kaba nyngkong, u Shongknor u la pynsangeh shipor ïa ka dorbar namar ki MDC ka Liang Pyrshah kim shah ban wanrah ïa ka mang tyngka.
Haba ka dorbar kaba la sdang biang ha ka por 2:00 baje nohphai sngi, u Shongknor Bah Strongpillar Kharjana u la ailad beit ïa u Bah Seiborlang Warbah kum Executive Member ba khmih ïa ka tnat pla tyngka ban wanrah ïa ka mang tyngka hadien ba la kheiñ ïa ka jingbun briew dei hangne ki MDC ka Liang Pyrshah ki la mih jyndat noh napoh ka Dorbar.
Haba ïakren bad ki nongthoh khubor hadien ba ki la mih jyndat na ïingdorbar, u Bah Titos u la ong ba u Executive Member bad ka Executive Committee haba ki la bat ïa ka bor synshar kim don jingkhlieh namar ki khlem peit bniah haba ki la pynrung ha ka vote on account, kaba dei ka tulop ki nongtrei.
Kumta u Bah Titos u la ong kane ka pyni ba kim pat tbit ban pynïaid ïa ka council namar ki la wanrah ïa ka “supplementary demand” ha ka mang tyngka kaba pura kaba ym pat ju jia mynno-mynno.
U la ong, ki MDC Liang Pyrshah kin pyrshah beit ïa kane ka mang tyngka bad kin dang shong pyrkhat ba kin leh nangne shakhmat.
Haba ïakren bad u Bah Seiborlang Warbah, EM, u la ong ba u la wanrah ïa ka mang tyngka na bynta u snem 2025-26 ka long ban nym pynlut kai ïa ka pisa jong ka council.
U la pynshai halor ka jingkynnoh u nongïalam ka Liang Pyrshah Bah Titos Chyne ba kam don ka kyndon ban khang, kumta ka Executive Committee ka hap ban leh na bynta ka jingïaid jong ka kam.
Ha kane ka dorbar, u Bah Seiborlang u la wanrah ïa ka mang tyngka jong u snem 2025-26, kaba arspah arphew hynñiew klur sawphew phra lak laiphew san hajar hynriew spah arphew tyngka kaba dei ka mang pynlut bad ha ka jingmang pynmih ka long arspah arphew hynñiew klur sanphew lai lak hynriew phew hajar arspah hynriew phew tyngka.
