Shillong, Jylliew 24
U Myntri Rangbah ka Jylla, Conrad K Sangma u la pynpaw ka jingdom bad sngewbitar hadien ba ki nongthoh khubor jong ka jylla, ki la rah biang hakhmat jong u ïa ka jingkylli kaba ïadei bad ka shongsuk shong shngaiñ ha ka Jylla hi baroh kawei.
Kane ka jingdom jong u Conrad ka dei hadien ka jingïakren bad ki lad pathai khubor hadien ba la kut ka jingïalang ai jingïarap ka Sorkar Jylla sha 26 tylli ki Synjuk ïalehkai ha ka Sngi Ba-ar ha State Convention Centre.
Mar sien shah kylli, la hato ka Jylla ka long ne em kaba shngaiñ naba mynta ka don hapdeng ka jingpynkhreh ban pynlong ïa ka 39th National Games ha u 2027, ka jubab kaba sdang na u Conrad ka long ba u la buh jingkylli kylla ïa ki nongthoh khubor da kaba u ong, “Hato phi dang artatien ba ka Meghalaya kam long kaba shngaiñ.”
U Conrad u la ong ba u sngewsih ban ïohi ba ki lad pathai khubor mynta ki dang wanrah sah ïa kane bad u la kyntu ïa ki nongthoh khubor ba kan bha shi syndon ban kiar na kaba kylli ïa kum kine ki jait jingkylli. U la ong ba kaei kaba la dep ban jia ka la jia, hynrei sa shisien u la ban jur ïa ki nongthoh khubor ba kin kiar ban buh ïa kum kine ki jait jingkylli.
U Conrad u la ong ruh ïa ki nongthoh khubor ba kan bha ïa ki ba kin jubab lem na bynta u paidbah jong ka Jylla.
Haba ïadei bad ka jingmih paw ka kyrteng jong ka Meghalaya kum kawei na ki jylla kaba ka ri USA ka la bthah ïa la ki nongshong shnong ban kiar ka wan sha Meghalaya, u Conrad u la ong ba u la shimkhia bad shen un sa leit ban ïakynduh ïa u nongkit ktien syiem ka USA lyngba ka tnat jong ka Ministry of External Affairs bad kumjuh sha ka tnat jong ka Ministry of Home Affairs ha kaba un pynpaw ba kum kane ka jingpynmih kyrteng ka long ka bym lah ban pdiang, ka bym don nongrim bad ban kyntu ïa ka ophis nongkit ktien syiem ka USA ba kin pynkylla ïa kane ka jingpynbna jong ki.
Shuh shuh u Conrad u kyntu ba kum ki nongthoh khubor ki ruh ki dei ban don lem ïa ka jingkitkhlieh ban ym pynthohbria ïa la ka jong ka Jylla, bad u la kren shai kdar ba kum ki nongthoh khubor lada ki ïai kylli sah kumne, kane ka pynpaw ba lehse wat ma ki ruh ki lah ban long kiba pyrshah ïa kane Jylla.
