Shillong, Jylliew 24
Ka kynhun ki doktor na ki laiñ sumar bapher-bapher jong ka North Eastern Indira Gandhi Regional Institute of Health & Medical Science (NEIGRIHMS) ka la seisoh ha ka ban sumar ïa kawei ka samla kaba don ïa ka jingshitom kaba ñiar ïa kaba la tip kum ka “Stump Blowout,” ong ka kyrwoh na u heh ophisar ha ka Sngi Ba-ar.
Kane ka samla ka don ïa ka jingshitom kaba ñiar kaba la tip kum ka “Stump Blowout”, ka jingpang kaba saphriang ha ki tor ha ryngkat ka jingpang ‘pneumonia’ kaba buh jingma ïa ka jingim namar ka jingplie biang jong ka lynti ring mynsiem kaba la khang hadien ka jingsumar ha u snem 2019.
Namar ka jingbym ïoh ïa ka jingsumar kaba mardor – namar ka jingtroiñ ha ka jinglong-jingman ha ryngkat bad ka jingshitom kaba don ha ka, la pynbit pynbiang ïa ka koit ka khiah jong ka nongpang ha ka ICU ha ka ‘Single-Lung Ventilation’.
Hadien kane, na ka liang katei ka kynhun ki doktor ka la shim ïa ka sienjam bad ha ka jaka ban jied ïa ka jingsumar da kaba shu puid, ka la ïaid shakhmat bad ka rukom sumar kaba thymmai ka bym donkam ban puid – lyngba u ‘Stent Silicon’ ba la shna pynwandur ha ka rukom jong u ‘Y’.
Ha ryngkat ka jingshna pynwandur ban khang shipor ïa ka lynti ring mynsiem kaba la plie biang, u ‘Stent’ u la khang lad ïa ka jingsaphriang jong ka jingpang sha u tor uba koit bad u la ailad ïa ka nongpang ban ring mynsiem khlem ka jingkyrshan jong ka ‘Ventilator’ ne ka kor ring bad pynhiar mynsiem.
Ym kum ki ‘Stent’ nar, ïa une u tiar ‘Silicone’ lah ban weng da kaba suk shisien ba la lah ban ïaid shakhmat bad ka jingsumar ka ban pynbha biang.
Kane ka kynhun ka kynthup ïa u Dr. Vijay Noel Nongpur (Associate Professor, Department of Pulmonary Medicine), Dr. Reuben L. Kynta (Associate Professor, Department of Cardiothoracic and Vascular Surgery), Dr. Neelamjingbha Sun (Assistant Professor, Department of Cardiothoracic and Vascular Surgery) bad Dr. Advait Mohan (Senior Resident, Department of Pulmonary Medicine).
Na ka liang u Director ka NEIGRIHMS, Prof. Nalin Mehta u la ai jingïaroh ïa ka kynhun na bynta ka rukom treikam bathymmai jong ki bad bynrap ba kane ka dei ka sien nyngkong ba la pyndonkam ïa kum une u ‘Stent’ hapoh ka thaiñ bad ki rukom sumar ba kum kine ki rah ïa ka nam jong ka NEIGRIHMS ha ka ban pynbiang ïa ka jingsumar kaba paka ha ka liang ka koit ka khiah hapoh ka thaiñ.
