Shillong, Jylliew 24
Hadien katto-katne kynta ba ki MDC jong ka liang pyrshah ka ïingdorbar thawaiñ ka Khasi Hills Autonomous District Council (KHADC) ki la mih jyndat na ka Dorbar Lyiur ha ka 24 tarik u bnai Jylliew, 2025, kitei ki MDC kiba kynthup ïa ki MDC ka UDP, NPP bad HSPDP hapoh ka jingïalam jong u Bah Titosstarwell Chyne, ki la leit ban phet bak sha u Myntri ba dei khmih ïa ka tnat District Council Affairs (DCA) bad uba dei ruh u Symbud Myntri Rangbah ka Jylla, u Bah Prestone Tynsong ha Secretariat ban ujor halor ka jingwanrah ka Executive Committee ka Voice of the People Party (VPP) ïa ka Supplementary Budget khlem pat mynjur shwa ïa ka mang tyngka bapura bad ka jingleh donbor da kaba wanrah ïa ka ‘voting’ khnang ban ïoh ïa ka jingmynjur.
Haba kren sha ki lad pathai khubor hadien ka jingwan ïakynduh ïa u Bah Prestone Tynsong, u Nongïalam ka liang pyrshah hapoh ka Ïingdorbar ka KHADC, u Bah Titosstarwell Chyne u la ong ba ka jingwan ban ïakynduh ïa u Myntri ba dei khmih ïa ka tnat DCA ka dei halor ka jingbym sngew ïahap jong ki halor ka jingwanrah mang tyngka da ka EC ka KHADC hapoh ka ïingdorbar da kaba ong ba kane ka mang tyngka ka long ka bym shong nongrim bad ka bym ïaid katkum ki aiñ jong ka Riti Synshar Paidbah.
“Ngi shu wan ban pyntip sha u Myntri ïa kaei kaba la jia mynta ka sngi hapoh ka dorbar khamtam ka jingwanrah ïa ka mang tyngka kaba ym shong nongrim, ka bym shongnia bad ka bym ïaid katkum ki aiñ jong ka AD Rules bad jong ka Riti Synshar Paidbah ruh,” ong u Bah Titos.
Shuh-shuh, u Bah Titos u la ong ba na ka liang ka liang pyrshah ka la ailad ïa ka EC ka KHADC ban pynbeit ïa ka jingbakla hadien ba la pynsangeh shwa ïa ka jingïashong dorbar hynrei ynda ki la wanphai biang sha ka jingshong sorbar, ka EC ka la leh donbor pat da kaba wanrah da ka ‘voting’ khnang ban ïoh ïa ka jingmynjur nalor ba ka VPP ka la don bun paid lypa hapoh ka ïingdorbar.
“Ki la wanrah pynban da ka ‘voting’ bad kane ka long ka bym pat ju jia bad lada leh ‘voting’, la sngewthuh ba ki don bun paid maki hynrei na ka liang jong ngi, ngin pyrshah ïa ka jingwanrah ïa ka mang tyngka bad kaba ar ngin pyrshah ïa ka jingleh ban wanrah da ka ‘voting'”, ong u Bah Titos.
U Bah Titos u la ong ba ka jingïakynduh ïa u Myntri ka long kaba sngewtynnad ha kaba na ka liang kitei ki MDC ki la ïoh ruh ban ai shibun tylli ki jingai jingmut sha u Myntri bad da kaba bynrap ruh ba kin ym pat lah ban ïathuh lut mynta sha ki lad pathai khubor halor ki jingai jingmut jong ki sha u Myntri.
