Imphal, Jylliew:
Ki bor pahara ha Manipur ki la pynjur ïa ki jingwad bad ki jingthwet ïa ki jaka ha kylleng ki jaka ba rit paid jong ki lum bad ki them. Kine ki jingpyntreikam, kiba thmu ban tehlakam ïa ki kam lehnoh bad ka jingdon tiar be-aiñ, ki la wanrah ïa ki jingïohkem kiba bun bad ki jingshah kem bunsien.
Ka jingkhynra kaba la pyntreikam da kaba bniah bha ha ka thaiñ Makhabasti kaba hap hapoh jong ka thanat Jiribam ka la pynlong ban kurup ïa ka jaka buh tiar bad ki tiar pynbthei kaba bun bha. Ha kawei pat ka jingkhynra ba la pynlong da ki bor wad bniah ha ka 22 tarik, Jylliew, saw ngut ki dkhot jong ka kynhun ba la shah ñiew beaiñ ka PREPAK (PRO) ki la shahkem na kiba bun ki ajka kiba don ha Imphal East District.
Ki briew kiba la shah kem ki dei kiba la tip kyrteng kum u Thingbaijam Philip Singh na Kongba Kshetri Leikai, u Lourembam Kumar Meitei ba la tip kyrteng ruh kum u Kanto na Lourembam Leikai (mynta u don ha Sawombung Relief Camp),u Laishram Haridas ba la tip kyrteng ruh kum u Holaiba na Uripok Sorbon Thingnel,u Yumnam Akash Singh na Hiyanglam Awang Leikai, Kakching District.
Na ka jingphla jong ki, ki shipai pahara ki la ïoh ban kurup ïa kiba bun ki tiar siat ba la buh na ki jaka ba don ha kjat jong ki lum Kalika kaba hap hapoh ka jingkhmih jong ki pulit ka Porompat ha Imphal East.
Ha ka jingkhynra ba kyrpang, ki pulit ka Manipur ki la ïoh kem ïa uwei u shipai PLA (People’s Liberation Army) uba la 35 snem ka rta uba la tip kyrteng kum u Sanasam Rajesh Meitei uba shong ba sah ha Hiyangthang Mayai Leikai, Imphal West. La ïathuh ba u la donkti ha ki kam dawa pisa kiba la thmu ïa ki skul bad ki jaka sumar shimet ha ka thaiñ Nambol.
Ki bor pahara ki la pynpaw biang ïa ka jingkular jong ki ban pynneh ïa ka shongsuk shongsaiñ ha kane ka thaiñ. Ki jingwad bniah ba la ïalam da ki riewshemphang la khmih lynti ba kin dang bteng ha ki sngi ban wan ban pynduh pyndam ïa ki kynhun lehnoh bad ban lah ban kurup shuh shuh ïa ki tiar ïaleh.
