Shillong, Jylliew 24
Ka Sorkar Jylla ka la pynkup burom ïa ka Samla Rifiness Warjri hadien ba ka lah dangshen ban kiew ïa u lum bajrong tam ha ka pyrthei, u Everest (8,848 ft).
Kane ka samla kaba pule ha St. Anthony’s College bad kaba shong ba sah ha Laitkor, ka la shah pynkup burom da ka cheque kaba T. 5 lak tyngka lyngba ka Chief Minister’s Fund kaba long kat kum ka jingpynbna da u Myntri Rangbah ka Jylla u Conrad K Sangma ha ka jingïalang kaba la long ha State Convention Centre Shillong ha kaba la ïadon lang u Myntri ka tnat ïalehkai u Bah Shakliar Warjri, ka Myntri ka tnat ka koit ka khiah Kong Ampareen Lyngdoh, ki ophisar ka tnat ïalehkai lem bad ki nongïalam na ki synjuk ïalehkai bapher bapher.
Shuh shuh u Conrad u la pynbna ruh ba katei ka samla kan ïoh sa T.1 lak tyngka na ka liang ka tnat ïalehkai.
Kumba ka paw ka Rifiness, 20 snem ka rta bad kaba dei ka NCC ha ka 61 Meghalaya Girls Battalion, ka la long kaba saw na baroh ki nongkiew lum jong ka Jylla bad kaba lai na ki kynthei ban kiew ïa utei u lum uba jrong tam ha ka pyrthei.
Haba pynpaw ha katei ka jingïalang, ka samla Rifiness ka la ong ba ka hap ban ïaid shibun ki jingeh bad kam long kaba suk ban poi sha ka thong, hynrei ka long ka jingïaid lynti kaba phylla namar ngam pat ju ïoh ïa kum kane ka lad ha ka jingim jong ka. “Nga sngewkmen eh ban long kawei na ka Jylla bad ïa ka thaiñ shatei lammihngi ba ngan ïoh ka lad ban kiew ïa u lum Everest.”
Kumba ka long mynta ka Jylla ka la lah ban sei haduh saw ngut kiba la lah ban pyndep ïa ka jingkiew ia u lum Everest. U Gary Jarman Lamare, u nongshom dur jong ka Discovery Channel, u la thaw ïa ka histori kaba nyngkong eh kum u nong Meghalaya ban poi shakliar jong utei u lum uba jrong tam ha ka pyrthei ha u snem 2012, hadien la bud sa ka Wansuk Myrthong, kaba dei ka pulit Jylla, ha u snem 2013 bad nangta pat bud sa ka Dolyne Kharbhih, ka NCC cadet barim kaba dei na ka thaiñ Ri Bhoi, ha u snem 2016.
