Shillong, Jylliew 24
U Symbud Myntri Rangbah ka Jylla, Bah Prestone Tynsong uba khmih ïa ka tnad Pohïing ka Sorkar Jylla, u la ther tyngeh ïa ka Sorkar United States of America (USA) ba kynnoh ba ka Jylla Meghalaya bad ka thaiñ Shatei Lam Mihngi jong ka Ri India, ki dei ki jaka ki bym shngaiñ ïa ki nongshangkai pyrthei.
Ka USA dang shen ha kine ki sngi ka la pynmih ïa ka jingbthah ban kyntu ïa baroh ki nongshong shnong jong ka kim dei satia ban leit kai sha ka Meghalaya bad kiwei-kiwei ki Jylla ha ka thaiñ Shatei Lam Mihngi jong ka Ri India namar ba ki dei ki jaka ki bym shngaiñ bad kiba ma bha ban leitkai.
Haba ïakren bad ki lad pathai khubor, na ka liang u Bah Prestone u la ong, “Ka long kaba sngewsih ba ka Sorkar United States of America (USA) ka la pynmih ïa kum kane ka jingbthah ïa ki paidbah nongshong shnong jong ka, da kaba u ong ba ngam tip nangno ka mih kane ka khubor bad nangno ruh ki ïoh ïa kane ka khubor”.
U Bah Prestone u la pynshai ba ka Jylla Meghalaya ka dei ka jaka kaba shngaiñ tam ha ka pyrthei ïa ki nongwan jngohkai.
U la ong ba ïa kane la sakhi ym tang ma ngi kiba na ka Jylla Meghalaya, hynrei da baroh kawei ka Ri India bad ym tang na ka Ri India bad wat ha satlak ka pyrthei baroh kawei ruh ki la sakhi ïa kane, ba ka Jylla Meghalaya ha ka jingshisha ka dei ka jaka kaba shngaiñ tam ban wankai bad ban pynlut ïa ka por shuti.
