Shillong, Jylliew 24
U Gennaro Gattuso u la shah thung kum coach bathymmai jong ka Italy hadien ba u Luciano Spalletti u la mih noh na kane ka kynhun, la pynbna ka synjuk ïalehkai phutbol jong ka Italy.
U Gattuso, uba la mih madan ban ïalehkai 73 sien na ka Italy bad uba la long ruh dkhot jong ka kynhun ïalehkai kaba la jop ïa ka World Cup ha u snem 2006, dangshen u la mih noh na ka klob jong ka Croatia, ka Hajduk Split, da ka jingïamynjur lang, hadien ba ka la wan ha ka kyrdan balai jong ka lympung ïalehkai katei ka ri.
Ka jingshah weng noh u Spalletti ka la long hadien ba u la don tang ar snem duna ban pynïaid ïa katei ka kynhun. U la long u nongïalam ha ka sien kaba khatduh ha ka jingïalehkai ba la jop da 2-0 pyrshah ïa ka Moldova ha ka Lah Sngi U Blei, ka sngi hadien ba u la pynbna ïa ka jingshah weng kam hadien ba ka la shah rem da 3-0 kol ha Norway ha ka jingïaleh-kai sdang jong ka Italy ban ïakhun na ka bynta ka lympung ïaknieh rung FIFA World Cup.
“U Gattuso u dei dak jong ka phutbol ka Italy bad kan dei ka sien kaba ar ba un don bynta bad ka kynhun,” la ong u president ka FIGC u Gabriele Gravina ha ka kyrwoh.
“Ka jingpynshlur, ka jingtbit bad ka jingshemphang jong u kan long kaba kongsan ha kaba shim ïa ki jingeh kiba hadien jong ka kynhun ïalehkai ka ri. U tip ïa ka jingdonkam jong ki jingthmu jong ngi bad nga ai khublei ïa u na ka bynta ka jinglong ba la pynkhreh bad aiti jong u ban pdiang ïa kane ka jingkitkhlieh. U ïasam ïa ka projek jong ka FIGC ban kyntiew ïa ka phutbol jong ngi, ha kaba ka sopti jong ka Italy ka dei ka bynta ba kongsan.”
U Gattuso, uba la ïalam lynti ïa ka Napoli ban jop ïa ka Coppa Italia ha u snem 2020, u don ïa ka kamram ban pynpoi ïa ka Italy sha ka World Cup jong u snem ban wan, hadien ba ka la duh rung arsien arwat jong katei ka lympung.
U Gattuso u la sdang ïa ka kam kum u coach bad kum u rangïalehkai na ka klob na Switzerland ka Sion ha u snem 2013 ha kaba u la pyndep ïa ki sngi ïalehkai jong u hadien 13 tylli ki samoi bad ka AC Milan, hynrei u la shah weng noh hadien ba u la lah ban pynjop tang arsien na shiphew tylli jingïalehkai.
Ha ki 12 snem jong ka jingïaid lynti jong u kum coach, u Gattuso u la shimti ban pynïaid haduh khyndai tylli ki klob.
