Shillong, Jylliew 24
U Myntri Rangbah ka Jylla, u Conrad K. Sangma ha ka Sngi Ba-ar u la ban jur halor ka jingdonkam jong ka jingstad ha ka jingsngew, ka jingïaishah, bad ka rukom treikam kaba buh hakhmat eh ïa ki paidbah ha ka jingshakri.
U Sangma u la ong ïa kane haba kren ha ka ‘Induction Training Program’ jong ka MCS Batch u snem 2025.
Ha kajuh ka por, u Myntri Rangbah u la kyntu ïa ki ophisar ba dang shah thung thymmai ban trei da ka jingthmu bad ka jingsngewrit, da kaba buh hakhmat eh ïa ki jingdonkam jong ki paidbah kiba ki shakri.
“Ka jingshakri paidbah ka khot na bynta ka jingkitkhlieh kaba khraw tam. Ha ka jingpyrshang jong ngi ban pyndep ïa ki kamram bad ki thong, ngi dei ban kynmaw ba ka tynrai ba hakhmat bad banyngkong eh jong ka rukom treikam jong ngi ka hap ban long na bynta ki paidbah,” u la ong.
Haba pynpaw ïa ka jingdonkam jong ka jingstad ha ka jingsngew, u Myntri Rangbah u la ong, “Ka jingstad ha ka jingsngew ka long kaba kongsan bha ha ka kam. Phi hap ban nang kumno ban khmih ïa ki jinglong-jingman.”
Na ka liang u Sangma, u la ai jingmut ruh ïa ki ophisar ban long kiba ïaishah bad kiba kloi ban sngap ïa ki jingpynsngew jong ki paidbah, da kaba ban jur ba ka jingïakren bad ki paidbah ha shuwa ban shim ïa ka rai ka long kaba donkam.
Haba kren shaphang ka jingdonkam ban ïamir jingmut ha shuwa ban shim ïa ka rai, u la ong, “90% na ka por, nga la ïohi ba ki jingeh ki mih namar ba ngi ïaid shakhmat khlem da ïamir jingmut bad ki paidbah. Kumta, ka long kaba donkam eh ba ha shuwa ba ngin shim ïa ka rai, ngi dei ban ïakren bad pynbeit.”
Shuh shuh u la ban jur halor ka jingdonkam jong ka jingïatreilang bad ka jingïamir jingmut na bynta ka jingsynshar kaba paka.
“Trei da ka jingthmu bad ka jingsngewrit ban shakri ïa ka imlang-sahlang. Buh hakhmat eh ïa ka jingstad ha ka jingsngew bad ka rukom treikam kaba buh hakhmat eh ïa ki paidbah. To long kiba ïaishah bad kiba kloi ban sngap ïa ki jingeh jong ki paidbah,” u la ban jur.
