Amlarem, Jylliew 24
Duna lai spah ngut ki longkmie kiba dang punkhun napoh ka thaiñ Amlarem Block, ki la ïoh jingmyntoi na ka Special Antenatal Care (ANC) Health Camp kaba ai kyrpang ïa ka jingsumar ïa ki longkmie shwa ban kha khun.
Ïa kane ka Health Camp la pynlong da ka Amlarem Aspirational Block Programme (Health Dept, ICDS Dept bad C&RD Dept) ryngkat ka jingïatreilang ka Directorate of Health Services (MCH & FW) bad la kyrshan da ka Meghalaya Health Strengthening Project (MHSSP).
Ïa ka jingïalang kaba la pynlong ha Hall Syiem Jingsuk Cathedral, Amlarem la donlang ruh u Chief Adviser ka Sorkar Jylla bad MLA ka thaiñ Ma Lahkmen Rymbui kum kongsan, ka Directorate of Health Services MCH & FW ka Dr N. Kharsahnoh, ka SDO Civil Amlarem Civil Sub-Division A. Raajsshre, u BDO ka Amlarem Dr D. Lyngdoh, ki doktor nalor kiwei-kiwei ki ‘riew rangbah ka thaiñ.
Ha kane ka jingïalang ki doktor kiba peit kyrpang ïa ki kynthei, ki la pynlong ka jingpeit bniah hashen lane Spot OPD screening ha katei hi ka jaka, ka jingleh Ultrasound ïa ki longkmie kiba dang punkhun kumjuh ki jingai jingmut kiba donkam halor ka koit ka khiah jong ki longkmie da kaba pynthikna ba ki longkmie armet kin ïoh ïa ki jingdonkam kum ka jingbam, ka jingsumar shwa ban kha khun bad ki jingeh kiba ju jia haka jingkha khun.
U Ma Lahkmen Rymbui ha ka jingkren u la pyrto ïa ki kam kiba ka Sorkar Jylla hapoh ka jingïalam u Conrad K. Sangma kala la leh na ka bynta ka koit ka khiah jong ki nongshong shnong khamtam ki longkmie kynthup naduh ka jingwanrah ïa ka State Health Policy, ka jingpynbiang ïa ka Transit home ne ka jaka sah shipor ban pynïoh jingsumar ïa ki longkmie kiba sah ha ki jaka ba jngai, ka jingwanrah ïa ka Early Child Development Mission na ka bynta ban peit ïa i khunlung ynda la kha haduh ban dap lai snem bad ruh shibun ki prokram bad skhim na ka bynta ka jingmyntoi jong ki nongshong shnong.
Haba ïadei bad ka Megha Health Insurance Scheme (MHIS) ne Smart Card kaba ai jingmyntoi ïa ki paidbah ha kaba siew lang ïa ka bailut-baisep haba leit shah sumar-sukher ha ki hospital khamtam ïa ki briew kiba duk, u Ma Lahkmen Rymbui u la pynpaw ruh ka jingsngew diaw namar haduh mynta dang bun kiba kyntait ban leh ïa u Aadhaar ban pynïasoh bad ka MHIS Card.
“Ym don Ma, ym don Woh, ym don MLA palat ban ïa ka Smart Card,” la ong u Ma Lahkmen bad kum u nongmihkhmat ka thaiñ u pynpaw ruh ka jingsngewsih namar da ki phew ngut ki nongshong shnong jong ka Amlarem Constituency ha ka shi taïew ki ïakynduh MLA ba ki shem jingeh ban siew ïa ki bai hospital bad ha kajuh ka por u la pynshlur ruh ban pynrung kyrteng Aadhaar noh ïalade kham kloi khnang ba kin ym duh ïa ki jingmyntoi bapher bapher ba la ai da ka Sorkar India.
U MLA u la pynkynmaw ruh ïa ki longkmie halor ka jingma jong ka jingshong kha khynnah, da kaba u kyntu ban long ki nongrah khubor sha ki shnong ki thaw ki jong ki ban sneng ban kraw ïa ki khun samla ba kin kiar na ka jingshong kha khynnah namar ym tang ba ka ap jingma ïa ka koit ka khiah ka jong ki hynrei ka long ruh kaba beaiñ.
U la kyntu ruh ïa ki longkmie ban sumar ïalade bad ïa u khunlung ban dangkha khnang ba ka ïing ka sem kan long kaba koit ba khiah namar kadei ka spah bah.
Ka Directorate of Health Services MCH & FW, Dr N. Kharsahnoh ha ka jingkren ka la pynpaw ïa ka jingdonkam ka Ante natal check-up khamtam lai bnai ha ka por ba pun nyngkong ïa i khunlung. Ka la pynshlur ruh ïa baroh ki longkmie kiba dang pun khun ban pynrung kyrteng na ka bynta ka jingsumar ANC bad ban shim kabu ïa ki jingshakri ba la ai da ka tnad ka koit ka khiah.
Ka jingsumar shwa ban kha khun kaba kynthup ïa ki jingpeit bniah man ka por bad ka jingtest shwa ban kha khun, ka long kaba donkm bha na ka bynta ban buddien ïa ka koit ka khiah jong ka kmie bad ïa u khunlung, ka la bynrap.
Ka la ïaroh ruh ïa ka ophis jong ka District Medical & Health Officer kaba la pynlong ïa kane ka prokram bad ka la ai khublei ruh ï ka jingpyrshang jong ka Sorkar ban pynduna ïa ka Maternity Mortality Rate (MMR) ne ka jingïap ki longkmie ba armet ha ka por kha khunlung.
Ka la ai khublei ruh ïa ka jingtrei jong ki ASHA bad pynshlur ïa ki kmie kiba dangpun khun ban ïatreilang bad ki ban pynthikna ïa ka jinglah ban ïoh ïa ki jingshakri jong ka ANC.
Shwa kane u Dr A. Khonglah SDM&HO cum BMO Amlarem, u la pyntip ba hapoh ka Amlarem la don 15 ki jaka sumar kynthup ki CHC, PHC bad Sub Health Centre. Ka ka jingpynrung kyrteng ha ka ANC ka long 53% bad ki longkmie kiba kha khun ha ki jaka sumar ka long 73%.
Ha kane ka jingïalang la pynkup burom ruh ïa ki jaka sumar ba la pynskhem da ka NQAS ba kynthup ka Mupyut Health & Wellness Centre, Khonglah Health & Wellness Centre bad Syndai Health & Wellness Centre, ki 5 ngut ki ASHA kiba la trei shitom ha ka por ka jingpynrung kyrteng ANC, ki SHG nalor kiwei.
