Shillong, Jylliew 24
U Superintendent of Police (SP) ka East Khasi Hills District, Bah Vivek Syiem, u la ong ba ki 3 ngut ki briew kiba dang shu dep shah kem dang shen bad kiba la shah kynnoh ba ki la donkti ha ka jingïadei ban pynjot ïa ki sabut halor ka jingshah pynïap u Raja Raghuvanshi, yn sa wanrah ïa ki hakhmat ka ïingbishar ha ka Sngi Palei.
Kine 3 ngut kiba la shah kem ki long u trai jong ka ïing ba sah wai ka Sonam Raghuvanshi hadien ba ka la wanphai na Shillong ïa uba la tip kyrteng kum u Lokendra Singh Tomar, u Security Guard ïa uba la tip kum Balwinder bad u Shilom James uba don bynta ban ai wai ïa katei ka ïing ban sah ka Sonam ha Indore.
Haba kren sha ki lad pathai khubor ha ka 24 tarik u Jylliew, 2025, u Bah Vivek u la ong ba wat la ki pulit ki la duh ïa ki sakhi hynrei ki la ïoh ban shim ïa ki lyngkhot jong ki sabut ba la thang bad la phah sha ka kynhun Forensic ba kan peit bniah kiei kitei ki tiar ba la thang.
U la ong ruh ba ki don ki sakhi ba kine ki tiar ba la thang ki lah ban dei ka Phone hynrei ym don kino-kino ki dak ba ki lah ban dei ka pistol ne ki ksiar, kumta u la ong tad haduh ba yn wan ïalam ïa kitei ki 3 ngut sha Shillong yn sa lah ban tohkit bniah ïa ki.
“Ka jingpynjot ïa ki sabut ka long ka kam runar. Ngi don ki sabut kiba biang, hynrei kane ka pynlong ïa ka mukotduma kaba pura bha. Ka tiar kaba la don ha Weisawdong bad kaba la poi sha kata ka ïingsah wai ka pynïasoh ïa ka nongshah kynnoh bad ka kam runar. Kumta ki briew kiba la pynjot ïa kata ka sabut ruh ki donkti lang,” ong u SP.
U SP u la ong ba ki Pulit ki la shim ïa ki lyngkhot bad ki tiar baroh kiba la thang bad ki la phah sha ki nongtohkit jong ka Sorkar Pdeng.
“Katto-katne ki lyngkhot-lyngkhai kiba la thang ki don hangta, bad ngi dang hap ban pynthikna ki dei kiei, lehse, ka lah ban dei ka phone. Ym pat don dak jong kano-kano ka pistol ne ki jingdeng ksiar haduh mynta,” ong u SP.
U la ong ba 2 ngut na kine la ïoh ïa ka Transit Remand kaba 7 sngi bad katba ïa uwei pat uba dang shu shah kem na Gwalior ruh ki pulit kin sa pan ïa kajuh ka Transit Remand.
U la ong ba kine baroh 3 ngut kim donkti ha ka kam pynïap hynrei ki donkti ban pynjot ïa ki sabut bad u la ong ruh ba ki pulit ki don ïa ki sakhi-sabut ba kine ki donkti ha ka ban rah ïa ka synduk ban buh ïa ki ksiar jong u Raja bad ka Sonam.
U la ong ruh ba ka lah ban dei ba kine kiba pynjah ïa ki sakhi ki kwah lalot haba ki ïohi ba ki don ki ksiar bad ki pisa ha ka synduk bad ki sa shim ïa ki khlem tip ba ki pulit kin sa wad sabut ïa kitei ki tiar.
“Ki don ki sabut kiba kongsan, ka ksiar jong ka Sonam bad u kynjri jong u Raja, ki don ha kata ka synduk. Kine ki tiar ki la poi ha Indore bad kata ka kylla long ka sabut kaba kongsan, hynrei kine ki briew ki la pynjot ïa ka. Tang kawei ka daw kaba lah ban long kaba nga lah ban ïohi ka long ba ka dei ka jinglalot jong ki. Lehse, kine ki briew ki la sngew lalot spah hadien ba ki la ïoh jingtip ba la kem noh ïa ki nongshah kynnoh. Ngi don ruh ïa ka jingpynshisha ba ki la sei ïa ka synduk shabar,” bynrap u SP.
Ha kaba ïadei bad ka jingtohkit ïa ki bahaïing ka Sonam Raghuvanshi, u SP u la ong ba ym ïohi dak eiei ba kine ki lah ban donkti lang hynrei ïa baroh ki jingtohkit yn sa wanrah da ka Special Investigation Team (SIT) hadien ba la wanphai sha Shillong hynrei u la ong ruh ba la tikna ba ka Sonam Raghuvanshi bad u Raj Kushwaha ki don ka jingïadei hapdeng jong ki.
Ha kaba ïadei bad ka jingdawa ki bahaïing u Raja Raghuvanshi ban leh da ka Narco Test ïa ka Sonam Raghuvanshi bad u Raj Kushwaha, u SP u la ong ba na ka liang ki pulit ki la ïoh lut ïa ki sakhi-satar kumta ym donkam shuh ban leh ïa ka Narco Test bad ha kawei ka liang ruh ka Supreme Court ka la khang ban leh Narco Test.
“Ïa ka jingleh Narco Test la ju leh haba ym don satia ki sakhi, bad ïa ka jingleh Narco Test la khang ha ka jingshisha da ka ïingbishar ba ha khlieh duh”, bynrap u SP.
