Shillong, Jylliew 25
U Myntri Rangbah-duh ka Ri, Narendra Modi u la pynpaw ïa ka jingsngewnguh ïa ka jingïohpdiang ïa ka jaiñ Ryndia kaba la ai sngewbha da u Myntri Rangbah ka Jylla u Conrad K Sangma bad u la ong ba kane ka dei ka shap jong ka jingriewspah ka Jylla ha ki jingdon jingem kiba rim bad ka jingsarong.
Ha ka shithi kaba la phah ha ka 24 tarik u Jylliew 2025, u Myntri Rangbahduh u la pynpaw ïa ka jinglong kongsan ïa kane ka jingai sngewbha bad bynrap ba ka don ka jingdawa kaba jur ha ka pyrthei baroh kawei ïa ki mar kiba ïai neh bad kiba la pynmih tynrai kum ka jaiñ Ryndia. U la ong, “Ka rukom pyrkhat ka jong phi ka long kaba ktah bha bad ka long kaei-kaei kaba dei ban ai jingïaroh”.
Haba pynpaw ïa ka jingkongsan ki mar kiba ïadei bad ka mariang bad kiba don ruh ïa ka jingkitkhlieh ha ka imlang-sahlang, u Modi u la ong, ka jaiñ Ryndia ka ïeng kum kata ka bym ktah than ïa ka mei mariang bad ka dei ka rukom pynmih tynrai. U la kdew ruh ba ka jingai dang shen ïa ka shap Geographical Indication (GI) ïa ka jaiñ Ryndia, ka dei ka lynti ban ïaid shakhmat ha kaban kyntiew ïa kane ka mar kaba la pynmih tynrai da ki paid riewlum ha ki rynsan jong ka pyrthei.
U Modi u la pynkynmaw ruh ïa ka jingwan jngoh ka jong u ïa ka jylla Meghalaya, u la ïaroh ïa ka rukom long ki briew, ka jingitynnad jong ka Jylla bad ïa ka jingtbit jong ki samla.
“Haba nga wan jngoh ïa ka Meghalaya, nga dap da ka jingsngewkmen ïa ka jingieid jong ki paidbah, ka jingitynnad jong ka mariang bad ka jingtbit jong ki samla kiba khlaiñ” u la thoh ha ka shithi kaba la phah sha u Conrad.
Haba ïengskhem ha ka jingkular na ka bynta ka jingkiew jong ka Meghalaya, u Modi u la ong, “Ryngkat lang, ngin ïa bteng ban shakri ïa ki paidbah ka jylla bad ban pynthikna ba ka Meghalaya kan leh ïa ka bynta kaba khraw ha kaban thaw ïa ka Viksit Bharat.”
Ha kawei pat ka liang, u Myntri Rangbah u Conrad K Sangma u la pynpaw ïa ka jingsngewnguh ïa u Myntri Ragbahduh ka ri u Narendra Modi halor ka jingithuh ïa ka ‘Ryndia’ – ka jingïoh shap ka Meghalaya na ka GI ïa ka Eri silk, kaba la thaiñ da ki longkmie jong ka Ri Bhoi District.
Haba thoh ha ka rynsan X, u Conrad u la ong, “Nga sngewnguh ïa u Myntri Rangbahduh ka ri u Narendra Modi halor ka jingithuh ïa ka Ryndia, ka jingïoh ka Meghalaya ïa ka shap na ka GI ha ka Eri silk, ka jingthaiñ kti jong ki longkmie jong ka Ri-Bhoi District.
