Jowai, Jylliew 25
Ka Synjuk Waheh shnong Ri Jaiñtia ha ka kyrwoh ba la phah da u Vice President, Ma DS War, ka la pyntip ba ha ka jinghiar sha ka shnong Lapangap ha ka 25 tarik Jylliew ka la lap ïa ka jingleh donbor jong ka Sorkar Assam ha ki thaiñ khappud haba ka Karbi Anglong Autonomous Council ka la thung dieng be-aiñ ha ka jaka kaba dang hap hapoh u pud u sam jong ka shnong Lapangap.
Kumta, kum ka Synjuk Waheh shnong Ri Jaiñtia ka kyntu ïa ka Sorkar MDA 2 ban pynkloi ban pynbeit ïa u pud u sam khnang ban lait na ka huri-hura bad lada kane ka jingshah thombor bad shah ñiew beiñ jong ki shnong Pnar kiba don ha khappud ki dang ïai bteng kumne shi kumne ka lah ban wanrah ïa ka jingïaumsnam hadien-habud.
Ha kajuh ka por ka Synjuk Waheh shnong Ri Jaiñtia ka ai khublei ïa ka Elaka Shilliang Myntang bad kumjuh ïa ki kynhun sengbhalang bapher bapher kiba wan ban ïa shim bynta bad ka dorbar shnong Lapangap ban ïada ïa u pud u sam jong ka shnong.
