Jowai, Jylliew 25
Hadien ka jingbym lah jong ki bor District ka West Jaiñtia Hills District bad West Karbi Anglong District ban pynsangeh ïa ka jingthung dieng da ki Karbi hapoh u lum jong ka shnong Lapangap la kumba shi taïew tam, ki nongshong shnong jong ka shnong Lapangap ki la mih paidbah ban jynrat naphang ïa ki tynrai dieng ban pynkhyllem bad thang ïa ka ïing trep ba la shna da ki Karbi ha ka 25 tarik u Jylliew.
Ha kane ka jinghiar paidbah la synran lang ïa ki nongshong shnong ka Lapangap da ki nongïalam bad dkhot sengbhalang ba kynthup ka KSU, JSU, FKJGP, ka Synjuk Waheh shnong Ri Jaiñtia nalor kiwei kiwei de sengbhalang.
Kumba saw ne sanspah ki nongshong shnong Lapangap ki la mih na la ïing ha ka por kumba 10.30 mynstep ban leit hiar sha utei u lum uba ki Karbi ki la kam trai da kaba thung dieng wat hapdeng ka jingpyrshah jong ki nongshong shnong Lapangap.
Ha ka por 11 baje mynstep ki nongshong shnong Lapangap ki la poi ha utei u lum bad ki la jynrat bad phut naphang ïa ki tynrai dieng ba la thung da ki Karbi bad ki la pynkhyllem bad thang ruh ïa katei ka ïing trep.
Hadien katto-katne por, ki pulit Assam kiba la poi hajan katei ka jaka ki la siat sha suiñ bneng ban beh ïa kitei ki nongshong shnong Lapangap. Ki nongshong shnong Lapangap ki la thmu ban leit aireng ïa ki pulit Assam bad katto-katne ngut ki Karbi bad kane ka la pynlong ïa ki pulit Assam ban siat lyer pynsat khmat kumba saw san sien ban beh ïa ki nongshong shnong Lapangap. Hynrei ki nongshong shnong Lapangap ki la ïengskhem ha utei u lum bad bteng ïa katei jingphut dieng. Hadien katto-katne por la wan poi sa ki Magistrate bad ki heh pulit bad kumba shispah ngut ki pulit Meghalaya bad ki la beh ïa ki nongshong shnong Lapangap bad ki dkhot sengbhalang.
Ki nongshong shnong Lapangap bad ki dkhot sengbhalang ki la sdang ban pra bad leit phai noh sha shnong Lapangap. Hynrei kyndit-kynsan katto-katne ngut ki nong Karbi ki la leit sha Pynthor jong ki nongshong shnong Lapangap bad ki la pynjulor ïa ki hali pynthor bad ki la thang ruh haduh lai tylli ki ïing trep ha ki pynthor jong ki nongshong shnong Lapangap.
Kitei ki Karbi na shi liang lum, ki la tim sih bad hylla da ki ktien khlem akor ïa ki nongshong shnong ka Lapangap bad ïa ki pulit Meghalaya bad ki nongshong shnong Lapangap ki la pynphai ktien lang ïa ki.
Ki Karbi ki la pyndonkam ruh da ki jri siat sim bad siat pyrshah ïa ki nongshong shnong Lapangap bad pulit Meghalaya hynrei donbok kitei ki maw kim shym la dei ïa ki nongshong shnong Lapangap ne ki pulit Meghalaya.
Ki magistrate, ki heh pulit Meghalaya bad ki pulit bad ki heh pulit Assam ki la ïa pra na katei ka jaka ba la thung dieng ki Assam ha ka por 6.30 janmiet eiei.
Haba ïakren bad u Waheh Shnong Ma Deimonmi Lyngdoh, u la ïathuh ba ka jingïakynad ka la sdang naduh ka 10 tarik Jylliew haba ki nongshong shnong Karbi ki la wan kyntur pud biang sha ka shnong Lapangap da kaba pyndonkam da ki puh shilum ban puh ban lur ïa ka pynthor jong ka shnong Lapangap.
Halor kane ka jingkyntur pud ki nong Karbi, u Ma Deimonmi u la ong ba ki la pyntip sha ki bor pynïaid District jong ka West Jaiñtia Hills ha kaba ha kajuh hi ka sngi u Executive Magistrate Ma GH Passah bad u Additional Superintendent of Police u Ishan Gupta kumjuh ki bor pynïaid District jong ka West Karbi Anglong ki la pynlong ka jingïalang ha shnong Khanduli ha kaba na ka liang ki Karbi ruh ki la kular ban sangeh noh katei ka jingtrei ha Pynthor. Hynrei ha ka 19 tarik mynta u bnai, u la ïathuh ba ki nong Karbi ryngkat ka jingsynran ka KSA bad pulit Assam ki la bteng biang ban lur ïa ka pynthor.
Haba shimkhia halor ka jingkyntur pud jong ki nongshong shnong jong ka Karbi sha u pud u sam jong ka Lapangap, ki ar district kata ka West Jaiñtia Hills bad West Karbi Anglong District ha ka 20 tarik mynta u bnai ki la pynlong ka jingïakynduh lang ha BOP jong ka Assam kaba don ha ka shnong Khanduli bad kila hiar ruh sha pynthor bad pynsangeh ruh ïa ki Karbi ban lur ïa katei ka pynthor.
Hynrei tang shisngi jong ka jingïakynduh lang jong ki ar district, kata ha ka 21 tarik Jylliew ki nongshong shnong Karbi ryngkat ka jingsynran lang ka KSA bad pulit ki la pynlong syndon da ka jingthung tynrai dieng ha katei ka pynthor. Kumta ban ïada ïa la u pud u sam, u la ong ka Dorbar Shnong Lapangap da kawei ka sur kala rai ban leit tur hi dalade sha katei ka jaka. Kat haduh ba la thoh ïa kane ka khubor, ka jinglong jingman ha katei ka jaka kam pat long kaba shngaiñ namar ki nong Karbi ki dang ïalum paidbah ha pynthor ryngkat ki trok kit dieng.
