Nongpoh, Jylliew 25
Uwei u samla na ka shnong Umdihar ïa uba la tip kyrteng kum u Banker Syngkli, 26 snem ka rta, u la shah kem noh ha ka Sngi Balang ha ki bor shnong ka Pahamsyiem katba u dang leit ban dawa pisa na ki dukan shnong ha ryngkat ka jingshoh khawiang.
Ha ka jingtohkit jong ki nongïalam shnong, la lap ba utei u samla u la pyndonkam da ka ‘receipt bad letter head’ jong ka Ri Bhoi People Movement (RBPM) ban leh ïa katei ka kam dawa pisa bad la lap ruh ïa kawei ka shithi ban pan jingïarap pisa na ka ophis jong ka DMHO Ri Bhoi District ha kaba ïadei bad ka prokram ai jingpynshai paidbah halor ka shongkha khynnah bad ka jingngop ha u drok ha ka shnong Umrit, Western Ri Bhoi, kaba dei naduh u snem 2023.
Utei u samla, u la phla ruh sha ki nongïalam jong ka shnong Pahamsyiem ba kynthup ïa u Rangbah Shnong, Bah Jedwin Lyngdoh, Bah Wanphrang Sumer, Assistant Rangbah Shnong nalor kiwei kiwei ba u la ïoh ban lum pisa tang na kawei ka dukan bad phla ruh ba u dei ma u, uba la leit ban prong bad tuh ïa ki jingdon jingem bad ka pisa na ka ïingmane jong ka Balang Presbyterian, Umdihar kaba la jia ha u bnai Jymmang 2024.
Na ka liang jong ki nongïalam ka shnong Pahamsyiem hadien ba ki la pyndep ïa ka jingtohkit, ki la pyntip sha u Rangbah Shnong ka Umdihar bad aiti pat ïa utei u samla na ka bynta ba kin leh pat ïa kaba donkam halor katei ka kam dawa pisa bad kam tuh kam thiem.
