Shillong, Jylliew 25
Ka kynhun Pulit na ka Special Investigation Team (SIT) ba la thaw da ki Pulit ka East Khasi Hills kaba dang don mynta ha Indore, Madhya Pradesh ban tohkit halor ka jingshah pynïap u Raja Raghuvanshi, ka la ïoh ban kurup ïa kawei ka pistol bad ar tylli ki magazine na kawei ka wahduid.
Ka jingïoh kurup ïa kitei ki tiar da ki pulit ka dei na ka jingïalam lynti bad ka jingphla jong u Shilom James uba la shah kem ha kaba ïadei bad ka jingshim ïa ki pla ba la buh da ka kurim jong u Raja, ka Sonam Raghuvanshi ha ka ïing kaba ka la sah wai ha shwa ba kan shah kem ha ki bor pulit.
Nalor ka pistol, ki pulit ki la ïoh ruh ban kurup ar tylli ki kuli .32 na kawei ka wahduid ryngkat bad ka pisa T.50,000 na ka kali i10 jong u Shilom James kaba don ïa u registration number MP09-WG-2352 kaba u la shim na ka pla ba buh laptop jong u Raj Kushwaha.
U Shilom James u la phla ba ïa ka pla la dep ban thang bad ïa ka laptop pat la bret ha kawei ka jaka rud surok kaba ym pat lap haduh mynta.
U Shilom James, u dei nongaiwai ïing sha ka Sonam ha Indore hadien ba ka la wanphai na Shillong bad pynïap ïa u Raja Raghuvanshi ha Sohra ha ka 23 tarik Jymmang, 2025 ha ka jingïasylla bad u baieid jong ka, u Raj Kushwaha lem bad ki paralok jong u, kata u Akash Rajput, Anand Kurmi bad Vishal Chauhan.
Ïa u Shilom James la kem da ki bor pulit ha ka miet jong ka 21 tarik Jylliew, 2025 hadien ba la ïohi ïa u lyngba ki kor ringdur ba u la donkti ban sei ïa kawei pla na ka ïing ba sah ka Sonam ha ryngkat ka jingïarap jong u Balla Ahirwar uba dei Security Guard bad uba la shah kem ha ka step jong ka 22 tarik Jylliew, 2025.
