Nongpoh, Jylliew 25
Ki bor pulit jong ka Ri Bhoi District ha ka Sngi Ba-ar, ki la ïoh jingtip lyngba ki nongshong shnong jong ka thaiñ 17 Mer halor ka jingdon jong kawei ka metïap kaba la pyut bha marjan bad u post bording ilektrik ryngkat bad u waïar bording uba la noh sha khyndew.
Ka tyllong khubor na ki pulit ka la ïathuh ruh ba katkum ka jingtohkit kaba la pynlong ruh ha ka jingïadonlang jong ki bor ba dei khmih ka tnat MeECL bad doktor, la shem ba utei u rangbah u bym lah satia ban ithuh bad uba don ha ka rta kaba 30-35 snem eiei, u la ïap ha katei ka jaka namar ka jingshah bat bording ilektrik la kumba shi bnai ne ar bnai eiei.
Ki bor pulit ki la ïathuh ba utei u rangbah u jrong kumba 5 phut eiei bad phong ïa ka sopti poh kaba lieh, ka patlun rong ïong, u paiñpoh rong saw bad kieng ruh ïa ka pla rong jyrngam. Ïa ka met kaba sah jong une u rangbah, la rah noh sha jaka buh metïap jong ka Nongpoh Civil Hospital. Na ka liang ki bor pulit ki buh ka jingkyntu lada don kino-kino kiba don jingtip lane ithuh ïa une u rangbah ba kin pyntip sha u number +919856084514 jong ka Police Control Room, Nongpoh.
