Shillong, Jylliew 25
Ki paidbah nongshong shnong ka Mawngap Khliehshnong ha ka Sngi Balang, ka 25 tarik Jylliew 2025, ki la pynlong ïa ka jingïaid paidbah ne rally ban dawa na u Lyngdoh ka Hima Mawphlang ba un pynlong noh ïa ka jingjied Rangbah Shnong (RS) ha shnong Mawngap Khliehshnong.
Ki paidbah ha kane ka sngi ki la rah da ki plakad bad ki lama ïong kum shibynta ban pynrem jur ïa u Lyngdoh ka Hima Mawphlang halor ka jingbym pynlong shuh ïa ka ilekshon jied Rangbah Shnong bapura kaba la ïaid mynta lai snem kynthih.
Ha kane ka jingïaid paidbah ki nongshong shnong ki la pyrta pynrem ruh ïa ki nongïalam shnong kiba kynthup ïa u Acting Rangbah Shnong ka Mawngap Khliehshnong bad ki la dawa ruh ban ïoh da ka jingjied rangbah shnong kaba hok. Ki nongshong shnong ki la sdang pynlong ïa kane ka jingïaid paidbah ba la sdang naduh Khliehshnong bad ban ïaid kjat pynkut pat shaduh ka shlem treikam jong u Lyngdoh ka Hima Mawphlang.
Hadien ba ki nongshong shnong ka Mawngap Khliehshnong ki la poi ha ka shlem treikam u Lyngdoh ki la ïa pyrta jam da ka sur kaba ong, u Lyngdoh mynta u dei ban ai ka jubab kaba shai bad ba u dei ban pynlong noh ïa ka ilekshon jied thymmai ïa u rangbah shnong bad ki la ong ba lada u Lyngdoh um ai ka jubab kin sa jied hi noh ïa u rangbah shnong hakhmat katei ka ophis.
La sakhi ruh ba ha ka por ba ki paidbah nongshong shnong ki la poi ha khmat ka shlem treikam u Lyngdoh ki pulit ki la syrtap khraiñ ban ym ailad ïa ki paidbah ban rung shapoh bad la ïadonlang ruh na ka liang u majistor khnang ban lait na kano-kano ka huri-hura.
Haba kren sha ki lad pathai khubor, u Bah Phimonstar Shylla kum Convener, u la ong ba ka jingbym ïoh rangbah shnong mynta ka la ïaid la lai snem kynthih bad ha ka ilekshon ba la pynlong ha ka snem ba la dep ruh kam shym la pynhun satia ïa ki nongshong shnong namar ka jingbym ailad u Lyngdoh ïa u rangbah shnong barim ban leit thep kyrteng na ka bynta katei ka ilekshon.
U la pynpaw ruh ka jingbitar halor ka jingpynslem u Lyngdoh ban pynlong biang ïa ka ilekshon jied rangbah shnong da kaba ïa hun lang baroh ym ban shu jied rangbah shnong tang da ka mon lade shimet.
U la ong ruh ba ngin aipor ïa u Lyngdoh ba un jubab hapoh shi kynta ban jubab hakhmat ki paidbah bad lada um ai kano-kano ka jubab, ki paidbah ki la rai ba kin jied rangbah shnong hi noh mynta ka sngi hangne hakhmat ka ophis treikam jong u Lyngdoh bad kin sa leit pan pat ïa ka syrnot na ka District Council.
Na ka liang ki longkmie pat haba kren ha kane ka sngi ki la pynpaw lang ka jingbitar namar ba mynta ka la ïaid la kumba lai snem eiei ka shnong kam don ïa u rangbah shnong bapura bad ki jingmyntoi jong ki paidbah nongshong shnong ki la duh lut.
Hadien kumba shi kynta eiei ba ki paidbah ki la ïai por ïa u Lyngdoh ban jubab bad namar ba u Lyngdoh um shym la ai kano-kano ka jubab, kumba ki la rai naduh nyngkong ki paidbah ki la jied hi noh ïa u rangbah shnong bapura jong katei ka shnong hakhmat ka shlem treikam u Lyngdoh ha Hima Mawphlang.
Haba pyrshang ban ïakren bad u Lyngdoh ka Hima Mawphlang, Bah Great A. Lyngdoh ban sngewthuh kham shai halor kane ka mat jingdawa ki paidbah, hynrei na ka liang jong u pat u la kyntait ban ïakren namar ki daw bym lah kiar, kata ba ka kam ka dang don ha ïingkashari.
Ka kyrteng kaba ki paidbah ki la mynjur kum u rangbah shnong bathymmai jong ka Mawngap Khliehshnong ka dei jong u Bah Khamborlang Kharshandi.
