Ka Sorkar kan buh hakhmat eh ïa ka jingshngaiñ bad ïada ïa ki briew ba sah ha khappud ka Jylla bad Assam: Paul

Shillong, Jylliew 25

U Bah Paul Lyngdoh kum Nongaiktien ka Sorkar MDA-2 bad ha kajuh ka por kum Myntri ka Sorkar Jylla, ha ka Sngi Balang ka 25 tarik u Jylliew 2025 u la kular ba ka Sorkar kan buh hakhmat eh ïa ka jingshngaiñ bad jingïada ki briew ba sah ha khappud ka Jylla bad Assam hadien ba kyan ka jingïakynad na ka jingkynnoh wan thung dieng beaiñ ki briew na Assam ha Lapangap kaba hap hapoh u pud u sam ka West Jaiñtia Hills District.

“Ki Pulit ka Jylla ki la shimkhia bad leit sha kane ka jaka. Ngi sa tuklar ïa kane bad pynthikna ïa ka jingshngaiñ bad jingïada ïa ki nongshong shnong ki jaka ba shah ktah,” la ong u Bah Paul.

U Bah Paul u la ong ba un sa ïakynduh ruh ïa u Symbud Myntri Rangbah ba khmih ïa ka tnad kam Pohïing u Bah Prestone Tynsong ban nang ïoh jingtip shuh shuh halor kane ka jingjia.

Ki paidbhur palat 400 ngut eiei na Lapangap bad ki shnong marjan lem bad ki sengbhalang ki la leit ban pynpra ïa ka jingtei bad jynrat naphang ïa ki tynrai dieng ha Loom Pynthor, Lapangap, kum ka dak ban pynpaw ka jingpyrshah ïa ka jingwan thung dieng da ka Karbi Anglong Autonomous Council (KAAC) ïa kaba ki ong ba ka dei ka jingpyrshang ban kyntur beaiñ sha u pud ka Meghalaya.

U Bah Paul u la ïathuh ba u Symbud Myntri Rangbah ba khmih ïa ka Tnad Transport, Bah Sniawbhalang Dhar, u la dep pynlong ïa ka jingïalang jong ka Regional Committee ka West Jaiñtia Hills District dang ha kine artaïew ba la lah, hynrei u la ong ba um don jingtip pat ïa kane ka jaka ba thung dieng la ka hap hapoh ka jaka ïakajia ne kumno.

“Naba u Symbud Myntri Rangbah ba khmih ïa ka Transport u dei u Chairman ka Regional Committee ka West Jaiñtia Hills District, un dei u briew uba biang eh ban jubab ïa ki jingkylli jong phi,” u la bynrap.

Haba kylli pat la ka Meghalaya kan ujor pyrshah ïa kane ka jingkyntur pud beaiñ, u Bah Paul u la jubab da kaba ong, “Hooid, lada phi kynmaw ïa ka jingïalang ba ngi long hapdeng ki Myntri Rangbah, ka dei kaba sngewtynnad bha bad kum ka jingbuddien ïa kata, u Symbud Myntri Rangbah ba mihkhmat ïa ka West Jaiñtia Hills u la leit ban ïakynduh ïa ki briew na ka Jylla Assam, u Chairman ka Regional Committee na Assam. Nga ai jingmut ba phin buddien ïa kane ka kam bad u Symbud Myntri Rangbah”.

Haba ïadei bad ki jingpyrshang ban pynbeit noh ïa ki jingïakajia pud, u Bah Paul u la ong, ba haduh 5 tylli ki shnong ki la hap mynta ha ka thup kaba ngi ong ‘ki jaka ba la dep pynbeit’ bad ka Sorkar kan sa pynbna ïa kane ha ka Independence Day la 15 tarik u Nailar.

“Kumta shwa ba ngin poi sha ka 15 tarik u Nailar, ngin pyrshang katba lah ban pynbeit noh ïa kane ka sector ruh kumjuh,” la bynrap u Bah Paul.