Tura, Jylliew 25
Ki pulit ka East Garo Hills District ha ka jingkhynra jong ki ha ka Lah Sngi U Blei, ki la kem noh ïa 4 ngut ki briew kiba suba donkti ha ka kam tuh ha kaba ki runar ki bym ithuh satia ki la rung ha kawei ka jaka pynlang tiar kaba ha Williamnagar ha ka miet jong ka 11 tarik Jylliew, 2025. Kitei ki runar ki la rong noh ïa katto-katne ki tiar shna ïing lem bad kiwei-kiwei ki tiar.
Kitei ki 4 ngut kiba la shah kem ki dei kiba la tip kyrteng kum u Bikan D. Sangma (38 snem ka rta) na Dawa Nengkatokgre, East Garo Hills, u Jetlow R. Marak ba ju tip kum u Ajit (23 snem ka rta) na Akelgre, East Garo Hills, u Sengba N. Marak (25 snem ka rta) na Dawa Nengkatokgre bad u Pebiriush G. Marak ba ju tip kum u Pebut (30 snem ka rta) na Rangram Pattal, Shallang, West Khasi Hills.
Na kitei ki 4 ngut, ki pulit ki la kurup noh bun bah ki nar-rod (16 mm, 12 mm, 10 mm bad 8 mm), ki kor ‘CP Plus CCTV’, ki kor tylliat, ‘LED Monitor’, ka pakha bad kawei ka Bolero ‘Pick-up’ ba don ïa u nombor M-13-A-6609 kaba la pyndonkam ban tuh.
