Shillong, Jylliew 25
Namar ka jingsngewkhia halor ka jingshah thombor jong ki kynthei, khyllung, khynnah hapoh ka jylla, ka kyrteng jong u Raja Raghuvanshi, ka Sonam Raghuvanshi bad ka kynthei kaba la shah pynïap ha u lok ha Nongrah ka la mih ha ka jingïakren ha ka mat ban ïatai kaba la long ha ïingdorbar ka Khasi Hills Autonomous District Council.
Kane ka mat ban ïakren halor ka jingshah thombor ki kynthei ka dei kaba la wanrah da ka MDC ka NPP na Nongshken Konstitwensi Kong Grace Mary Kharpuri.
Ka Kong Grace ka la pynpaw ba ka jingshah thombor ïa kawei ka kynthei kaba dei na Nongshken Konstitwensi ha Nongrah ha kine ki sngi bad kiwei de ki jingjia.
Ka la ong ruh ba ha kine ki sngi ki khubor ki la mih beit tang ïa u Raja bad ka Sonam kaba shah thombor ïa u shynrang, kumta donkam ruh ïa ka aiñ ban ïada ïa ki longkpa namar ki bun ki jingjia kiba khlem paw pyrthei kiba la jia.
Ha kawei ka khubor, namar u MDC ka UDP na Sohïong-Nongspung Konstitwensi Bah Synshar Lyngdoh Thabah bad MDC na Nongpoh Konstitwensi Kong Rona Khymdeit ki khlem lah ban wan ha ki kynta kylli jingkylli, ka jingkylli kaba ki la buh la shu long lehnohei noh.
Kine ki jingkylli kiba u Bah Synshar Lyngdoh u la buh ka long ba la don ne em ka ai laisen khaïi kiba thymmai naduh u Lber 2025 haduh mynta. Ha ka juh ka por u la pan ïa ki kyrteng jong kine kiba pan laisen khaïi.
Katkum ka jubab ba la pyni ha Dorbar, u Executive Member Bah Winstontony Lyngdoh u la pyntip ba ki don 7 tylli kiba la dep ai laisen ha u Lber 2025 hynrei kane ka laisen kan kut tang hapoh 31 tarik Lber 2025.
Katba ka Kong Rona Khymdeit ka la buh jingkylli ïa ka rukom pynrung kyrteng ki jaka hapoh ka KHADC.
Hynrei ïa kine ki jingkylli la sepei noh ban jubab ha ïingdorbar namar kiba buh jingkylli ki khlem wan poi ha ïingdorbar.
Kumjuh, ar tylli ki motion ba la buh u Bah Synshar Lyngdoh bad kawei ka motion ba la buh da ka Kong Rona Khymdeit ki shu sepei khlem ïoh ban ïakren namar ki khlem wan poi sha ïingdorbar.
