Shillong, Jylliew 25
Ki pulit ka Anti Narcotic Task Force (ANTF) ki la ïoh ban kem noh ïa ki 3 ngut nongkhaïi drok kynthup ïa u nongkhaïi heh duh (main supplier) ha sor Shillong bad ïoh kurup bun bah u drok heroin.
Ki lai ngut kiba la shah kem ki dei ba la tip kyrteng kum u Rohit Mattu, Ansh Sher Gill ba ju khot sin u Suresh Gill bad u Raman Raina, ïathuh u Superintendent of Police ka ANTF u Jagpal Singh Dhanoa.
U Jagpal u la pyntip ba ka ANTF ka la ïoh khubor na u In-charge ka Cantonment Beat House ba ïoh bat ïa u Rohit Mattu na ki thaiñ Cantonment bad suba jur ba ïoh kurup lang ïa u drok na ka met jong u. U la ïathuh mar-mar u SI Pradeep Das bad ki nongtrei ki la leit sha Cantonment ban leh ïa ka kam kaba donkam.
U la ïathuh ba ynda poi ha Cantonment marjan ka NEHA Transport mar pyrshah ka Cantonment Beat House, ki la ïohi ïa u Rohit Mattu uba bat ïa kawei ka synduk rong saw bad haba talasi, la ïoh ban kurup ïa kawei ka synduk sabon kaba thep ïa u drok uba khia 10.26 gram.
Ha ka jingtohkit, la shem ba u Rohit Mattu u ju trei na ka bynta u Ansh Sher Gill ha ka Hardware Store kaba don ha Cantonment marjan ka Jowai Stand bad tip ruh ba u Gill u dei u nongshalan uba heh duh ha ka thaiñ Cantonment bad ki jaka ba marjan. La lap ruh ba u dei u briew uba la donkti teng ha kiba bun ki kam beaiñ.
U Jagpal u la ïathuh ba ka ATNF ka la leit kem ïa u Gill bad ha ka jingtohkit, une u briew u la phla ba u la pynïaid ïa ka hardware store ha Cantonment tang ban buhrieh ïa ki kam beaiñ jong u bad u la pyndonkam ïa u Rohit Mattu bad u Raman Rainia bad u Rohit Honda ban pynïaid ïew ïa u heroin ha Shillong.
Hadien kane, ka ANTF ka la leit ban kem sa ïa u Raman Raina bad ha ka jingtohkit la phla ba u Gill u la wai ïa kawei ka ïing ha Raid Laban ha ka kyrteng u Raman Raina bad Rohit Honda bad ha kane ka ïing la buhrieh ïa u heroin.
Ka ANTF ka la leit ban khynra ïa kane ka ïing ha Raid Laban bad la ïoh ban kurup sa 15 tylli ki synduk sabon kiba la thep ïa u heroin uba khia haduh 152.26 gram.
U Jagpal u la pyntip ba u heroin ba la ïoh kurup lang baroh u long 162.52 gram bad ïathuh ba mynta ka ANTF ka dang thwet ban ïoh kem sa ïa u Rohit Honda uba la phet rieh.
