Shillong, Jylliew 25
Ki runar bym lah ban ithuh ki la ïoh ban prong tuh ha kawei ka skul bad ban tuh noh ïa ka pisa kaba don ha kane ka skul.
Katkum ka khubor na ki pulit la ong ba u Bah Robinsen Kharbani, Headmaster jong ka Kmawan Secondary School u la ai ka jingujor ba ha ka 22 tarik mynta u bnai, ki runar bym lah ban ithuh, ki la prong tuh shapoh kane ka skul bad ban tuh ïa ka pisa kaba long T.7 hajar.
Ha kawei pat ka khubor, u Bah Bankhraw Kharkongor u la ai ka jingujor ba ha ka 23 tarik mynta u bnai, ha ka por kumba 3.30 mynstep, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AC-0477, kaba la pynïeng hajan ka jaka sah ka jong u, ha Umphyrnai Dong Dalum ha East Khasi Hills.
Kumjuh, na ka liang jong u Bah Ionnis Shabong u la ai ka jingujor ba ha ka step jong ka 23 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-X-9379 na ka shnong Mawklot ha East Khasi Hills.
Ha kawei pat ka khubor, u Ranjan Kumar Banerjee na ka Director (PA&F) NE Circle, Shillong u la ai ka jingujor ba ha ka 23 tarik mynta u bnai, ki runar bym lah ban ithuh, ki la prong tuh hapoh katei ka ophis bad ban tuh ïa ki cooper wires, hynriew tylli ki bateri bad ka modem kiba shongdor baroh kumba T.1 lak.
