Shillong, Jylliew 25
U Neymar u la pynjlan ïa ka kontrak bad ka klob kaba na Brazil, ka Santos haduh kaba kut jong u snem 2025, namar ba u pyrshang ban pynwandur biang ïa la ka rukom ïalehkai shwa ka FIFA World Cup jong u snem ban wan.
“Nga la shim ïa ka rai hapoh ka dohnud jong nga. Ka Santos kam dei tang ka kynhun jong nga, ka dei ka ïing jong nga, ka tynrai jong nga, ka khana jong nga, bad ka jingim jong nga,” la ong une u rangïalehkai ba la 33 snem ka rta ha ka kyrwoh na katei ka klob.
U Neymar u la sdang ïa ka jingïalehkai na ka Santos shwa ba un leit ïasoh sha ka Barcelona bad nangta sha ka Paris Saint Germain. Hadien ba u la ngat ha ki jingmynsaw ha Saudi Arabia, u la wanphai biang sha ka Santos ha u Kyllalyngkot ha kaba ka kontrak ka jong u kan poi sha sha kaba kut jong ka 30 tarik mynta u bnai.
Ki jingeh ha ka jingmynsaw kiba la khanglad ïa u tang ha ki hynñiew tylli ki jingïalehkai ha ki 17 bnai ha ka Al-Hilal.
U la ïalehkai 12 tylli ki jingïalehkai ha ki san bnai ha baroh ki jingïalehkai na ka bynta ka Santos, ha kaba u la thep lai kol. Ha ka jingïalehkai kaba khatduh jong katei ka lympung, u la shah beh na madan hadien ba u la ïohpdiang ar tylli ki yellow card hadien ba u la thep kol da ka kti pyrshah ïa ka Botafogo.
Hadien 12 tylli ki jingïalehkai jong kane ka lympung ha Brazil mynta ka samoi, ka Santos ka la lait na u laiñ jong ka jingma lyngba ka jingïapher kol.
Naduh ba u la wanphai sha Brazil, u Neymar u la shah kynthoh namar ba u la ïalehkai ha ka Rio Carnival bad namar ba u la mih madan ha ka Kings League kaba don ki 7 ngut ki nongïalehkai ha ka por ba u dangmynsaw.
U Neymar u dei nongïalehkai ba paw jong ka kynhun ïalehkai ka Brazil da kaba thep 79 kol, ar kol kham bun ban ïa uwei pat u nongïalehkai jong ka Santos, u Pele, hynrei ka jingwad jong u ban ïoh ïa ka takma jingjop jong ka World Cup ka la kut noh ha ka jingduh jingkyrmen.
U Neymar u la shah khot biang ha ka kynhun ïalehkai jong ka Brazil ha u Lber na ka bynta ar tylli ki jingïalehkai World Cup, hynrei u la weng noh ïalade namar ka jingmynsaw ha ka tyrpeng.
Ha u Jymmang, u coach bathymmai u Carlo Ancelotti u la iehnoh ïa u Neymar na ka kynhun ba nyngkong jong u. “Nga la jied ïa ki rangïalehkai kiba don ha ka met kaba biang bha. U Neymar u dang shu wanphai na ka jingmynsaw, baroh ki tip ba u dei u rangïalehkai uba kongsan bha bad ka paw shai ba ngi shaniah ïa u,” ong u Ancelotti.
