Shillong, Jylliew 25
Ka synjuk ki nongñiah kali kaba don hapoh ka shatri jong ka All Khasi Meghalaya Tourist Taxi Association (AKMTTA) kaba la ju pynsngew sha ki tnat bapher bapher jong ka Sorkar Jylla ban shna noh ïa ki policy halor ka jingïoh rung laitluid ki kali nabar Jylla. Ka synjuk ka la ju ïai dawa na ka por sha ka por halor kane mat, hynrei haduh mynta kam pat shym urlong.
Kumta ha ka Sngi Balang ka 25 tarik u Jylliew 2025, ka synjuk la leit ban ïakynduh ïa u Myntri Rangbah ka Jylla u Conrad K Sangma ha ïingsah jong u ban ïakren halor katei ka mat jingdawa.
Hadien ka jingïakynduh bad u Myntri Rangbah ka Jylla, u Bah Recaldinus Dohling u la ong, na ka liang u Myntri Rangbah, u angnud ban shna ïa ki aiñ kiba khlaiñ ha jaka jngohkai pyrthei bapher-bapher ban long ka lad kamai ïa ki trai ri trai muluk bad shen ruh un sa lum ïa ka jinglang na ka tnat Tourism, ka tnad ki pulit lem bad kiwei-kiwei ban ïakren halor kane.
“Ban nang pynkhlaiñ ïa ka kamai-kajih jong ki trai ri trai muluk khamtam ha ka jingdon ïa ki jaka jngoh kai pyrthei kaba la long ka lad kamai jakpoh ïa ki paidbah ka Jylla khamtam kiba im ha ki jaka ba bun ki jaka jngoh kai pyrthei, nalor ka jingdon ki jaka jngoh kai pyrthei bad ban don pat ki aiñ ne ki policy kiba biang haba ïa dei bad ka lad kamai khamtam ka jingïoh rung laitluid ki kali ba nabar Jylla ban ïalam ïa ki nongjngoh kai pyrthei,” la ong u Bah Ricaldinus.
Ka synjuk ka la dawa ruh na u Myntri Rangbah ka Jylla ba sngewbha ban khang noh ïa ki kali kiba wan nabar Jylla.
U Bah Ricaldinus u la ïathuh ba na ka liang u Myntri Rangbah u la ong ban shimkhia ïa kane ka kam da kaba u la kubur ruh ba un ym pynslem shuh bad ban leh kyrkieh noh ban ïa shong pyrkhat bad ka tnad pulit bad ka tnat Tourism halor kane ka mat jingdawa jong ka synjuk.
“Ban ong sngewhun ruh ym pat sngewhun halor ka jingdawa ka seng, hynrei ka seng ka kyrmen ba kane ka mat jingdawa kan urlong noh namar ïa kane ka jingdawa ban shna ïa ki policy halor ka jingïoh rung laitluid ki kali nabar jylla ka seng ka la dawa naduh u snem 2023,” la bynrap u Bah Ricaldinus.
