Nongpoh, Jylliew 25
Ka shlem treikam u District Sports Officer (DSO) lem bad ka District Social Welfare Officer (DSWO) Ri Bhoi District ryngkat bad ka jingïatreilang bad ka Kripa Foundation, Meghalaya, ha ka Sngi Ba-ar ka la pynlong ïa ka Inter Rehab Basket-ball Tournament kaba la wan ban ïashim bynta da ki khun samla bad nongtrei jong ki rehab bapher bapher kynthup ruh ïa ki kynhun na Umsning Tea Development Center, Umsning, Upper Shillong Catholic Parish Boys bad ki samla pule Intern na ki kolej bapher bapher.
Kumba ka phang pdeng jong kane ka lympung ïalehkai ka dei ban tylli kawei na ka bynta ban rat dyngkhong ïa ka jingngop naduh tynrai, la sakhi ha kane ka sngi ïa ka jingshim bynta shitrhem jong ki khun samla kiba la sei ïa la ki jong ki sap ki phong ban lehkai bha katba lah wat lada kiba bun kim dei satia ki rangïalehkai kiba la pyntbit kyrpang.
Ïa kane ka lympung kaba la kyrshan ruh da ka Nasha Mukt Bharat Abhiyan (NMBA) bad ka Ministry of Social Justice & Empowerment ka Sorkar Pdeng, ka thong ba kyrpang hi ban pynlong ïa kane ka lympung ïalehkai ka long ban pynsaphriang ïa ka khubor jong ka jingsniew jong ki jingdih pynbuaid kum u drok bad kiwei kiwei lyngba ki jaid jingïalehkai bapher bapher, ka jingïasyllok bad kiwei kiwei de.
Haba phai sha ka jingïalehkai kaba shongshit ha kane ka sngi, ha ka liang jong ki kynthei la rah da ka New Hope Center hadien ba ka la lah ban pynliem noh ïa ka Kripa Staff, katba ha ka liang ki shynrang pat la rah da ka Kripa Senior naba pynliem noh ïa ka Kripa Staff.
