California, Jylliew:
Ki pulit ka nongbah California ha ka Sngi Ba-ar, ki la pyntip ba ka nongkilan met kaba paw nam bha na California, kaba la ju ithuh kum ka Gloria Zamora bad kaba la don 40 snem ka rta, ha ryngkat bad u briew uba ka leit iakynduh, u Hector Garduno, 43 snem ka rta, ki la shah siat iap ha u kurim barim jong ka uba na Fontana, sha ka phang Shathie jong ka California ha ka Sngi Saitjaiñ.
La ong ba ki pulit ki la lap ia ka Zamora bad ia u Garduno na kawei ka jaka pynieng kali habar jong ka jaka bam ‘Sushi’, ha kaba baroh ar ngut ki la mynsaw na ka jingshah siat kuli ha katei ka jingjia.
La ong ba utei u kurim ba la iakhlad bad ka, u Thomas Alberto Tamayo Lizarraga, u la shah siat kylla noh ha uwei u heh pulit uba don shabar na ka kam bad uba leit poi thaw lap ia katei ka jingjia ha katei ka sngi.
U heh pulit Steve Reed, ha ryngkat ka tnat pulit Fontana, ki la iathuh ba kitei shi kurim ki dei kiba la dep ia khlad naduh ki por ba la leit bad ka dei kane ka daw kaba la wanrah ia katei ka jingjia, ha kaba utei u kurim barim jong ka, um shym sngewtynnad ia ka ba kan ioh briew biang da uwei.
La ong ba katto-katne ki heh pulit kiba don ha katei ka jaka, ki la iohsngew ia ka jingriew ka suloi na katei ka jaka ha katei ka sngi bad mar kumta hi ki la leit mareh bran-bran sha katei ka jaka bam, ha kaba ki la lap ia kitei ar ngut ha ryngkat utei u rangbah uba la dep siat ia ki baroh ar ngut.
Katei ka longkmie, kaba long ka nongkilan met ba pawnam bad kaba ju ai mynsiem ruh ia kiba bun ki samla bad ki kynthei, ka dei ruh ka kmie jong hynñiew ngut ki khun bad u Hector Garduno pat u dei uba la don lypa saw ngut ki khun.
