Shillong, Jylliew 25
Ka Summit FA bad ka Golflink SC ki la ïoh jingjop ha ka lympung ïalehkai 4th Division Under- 20 Football league 2025 ha ka Sngi Balang.
Ha kane ka lympung ïalehkai ba la pynïaid da ka Shillong Sports Association ha SSA Stadium kaba ha First Ground Polo, ka Summit FA ka la wanphai da ka jingjop hadien ba ka la lah ban pynliem noh ïa ka Dilingiem SC da 1-0 kol.
Wat lada ka la mad ïa ki ar tylli jingshah rem ha ki jingïakhun ba la dep, hynrei hynne ka sngi ka la lah ban pynurlong lyngba ka shi kol ba la thep da u Nicky Mawthoh ha ka minit kaba 22 na ka bynta ban ïoh lai point ha ka Group-C.
Kumjuh, ka Golflink SC ka la ïoh ïa ka jingjop balai hadien ba ka la lah ban pynliem noh ïa ka Mawshubuit SC da 1-0 kol bad kane ka la wan urlong lyngba u Ribansan Wahlang uba la thep ha ka minit kaba 39.
Lyngba kane ka jingjop ka Golflink ka la ïoh ban lamkhmat na ka Group-A ryngkat 9 point na ki lai sien ïakhun.
Haba phai sha kawei pat ka jingïakhun jong ka Group-A, ka Laitkroh SC bad ka Risa Colony SC ki la ïasam mar shi point hadien ba ki la ïakhaid mar 2-2 kol.
Ka Laitkroh ka la pynkhih jar nyngkong ha ka minit kaba 13 lyngba u Bankhrawlang Myrthong, hynrei shwa ban kut ka jingïalehkai jong ka kylla step u Seiboklang Mawrie (40+1) u la lah ban pynïakhaid na ka bynta ka Risa Colony.
Ka Laitkroh ka la thep kol biang ha ka kylla miet lyngba u Rishailang Myrthong ha ka minit kaba 67 ha shwa ba u Seiboklang un pynphai biang sa shisien na ka bynta ka Risa Colony ha ka minit kaba 73.
Kane ka lympung kan bteng biang ha ka Sngi Palei ha kaba ka Mawpdang SC kan ïakhun pyrshah ïa ka Pommura SC ha ka por 10:30 mynstep, kumjuh ka Nongkolew SC ïa ka Lummawbah SC por 1:30 mynsngi bad ka Mawphlang SC ïa ka Laitlulong SC ha ka por 4 baje nohphai sngi.
