Aizawl, Jylliew:
U Myntri Rangbahduh ka ri u Narendra Modi, kumba la pynbeit, u lah ban plie ïa ka lynti rel kaba jrong 51.38 km ka Bairabi-Sairang kaba pynïasoh ïa ka Mizoram bad kiwei kiwei ki jylla jong ka ri ha u bnai Naitung, ong ka khubor jong ki heh jong ka Northeast Frontier Railway (NFR).
Ki heh sorkar ki la ïathuh ba ka lynti rel Bairabi-Sairang kaba pynïasoh ïa ka nongbah Mizoram ka la jan dep bad ki la pynpaw ka jingkyrmen ba u Myntri Rangbahduh un sa plie noh shen ïa ka.
Hynrei ym pat don ka jingthikna halor ka jingplie kumba ka long mynta namar ba ka tnad rel ka dang hap ban rai ïa kane ka kam, ki la ong.
U Sumeet Singhal, u Commissioner of Railway Safety (Northeast Frontier Circle) u la jurip bniah ïa ka jingjngai kaba khatduh kaba 33.864 km naduh Hortoki sha Sairang hapdeng ka 6 tarik, Jylliew bad ka 10 tarik, Jylliew.
Ki heh sorkar ki la pynpaw ba ki la pynlut palat T. 5,000 klur, lane 97%, halor ka projek lynti rel, bad ki la pyndep 94.5% na ka jingtrei haduh mynta.
Ka projek lynti rel thymmai jong ka Bairabi-Sairang ka dei ka jingphylla jong ka tnad rel jong ka ri India.
Ka projek ka kynthup ïa 48 tylli ki lynti krem, 55 tylli ki jingkieng kiba heh, bad 87 tylli ki jingkieng kiba rit. Ka jingjrong jong ki lynti krem ha kane ka projek ka long 12,853 meter. Kane ka projek ka kynthup ruh ïa 5 tylli ki surok halor ki jingkieng bad 6 tylli ki surok hapoh ki jingkieng.
Ki Engineer ki la phiah ïa kane ka projek ha ki saw bynta, ka Bairabi – Hortoki, Hortoki – Kawnpui, Kawnpui – Mualkhang, bad Mualkhang – Sairang.
Ka jingai bor ka pyni ïa ka mawjam kaba kongsan sha ka jingpynïasoh ïa ka Aizawl, ka nongbah jong ka Mizoram, sha ka lynti rel jong ka ri bad ka pyni ïa ka jingangnud jong ka Rel India ban pynroi ïa ki jingtei ha ki jaka ba jngai bad kiba kongsan ha ka liang ka buit treikam.
