Shillong, Jylliew 26
Ka long ka burom ïa ka Jylla hi baroh kawei ha kaba 10 ngut ki nongïalehkai Muay Thai ka Jylla hapoh ka lama jong ka Muay Thai Association of Meghalaya (MTAM) ki la khur takma ha ka Asian Muaythai Championship 2025, kaba la poi sha kaba kut ha ka Sngi Balang ha nongbah Thai Nguyen Province jong ka ri Vietnam.
Ïa ki takma rupa la khur da u Aristone Syiemsad bad u Teiboklang Marbaniang ha ka “Mai Muay” Elite, katba ka Mery Christine Wriang ka la khur ïa ka takma rnong ha ka Under-23. Ïa ki takma rnong ha ka Combat la khur da u Bansahnam Kyrpang Warkhyllew (48kg), Aristone Syiemsad (57kg), Mery Christine Wriang bad ka Anita Rai (48kg).
Ka Mery ka la khur ruh ïa ka takma rnong ha ka Waikro (Traditional Dance), ryngkat u Bansahnam Kyrpang Warkhyllew bad u Teiboklang Marbaniang.
Kane ka kynhun ka la wanphai sha la ïing ha ka Sngi Palei ha kaba la pdiang burom ha kad liengsuiñ kaba ha Guwahati da u President rangbah jong ka Muay Thai Association of Meghalaya (MTAM) u Bah Angelus Sun ryngkat ki kmie ki kpa jong ki khynnah. La pdiang burom ruh ïa kitei ki nongïalehkai ha State Sports Council Hall kaba ha Nongpoh da ki nongïalam ka MTAM bad ki synjuk ïalehkai jong ka Ri Bhoi District.
Halor kane ka jingwanrah nam bad burom da kitei ki nongïalehkai, na ka liang u Bah Angelus Sun kum u nongïalam ka synjuk um lah khlem da pynpaw ka jingai khublei ïa kane ka kynhun kaba la lah ban pynpaw ïa ka jingtbit hakhmat ki nongïalehkai ka dewbah Asia.
Ha kajuh ka por u la ai khublei kyrpang ïa u Myntri Rangbah ka Jylla, u Conrad K. Sangma uba la don bynta ban kyntiew ïa ka jingïalehkai Muaythai ha ka Jylla bad ruh ïa u Myntri ka tnat ïalehkai ha ka Jylla, Bah Shakliar Warjri, ka Directorate of Sports & Youth Affairs kumjuh ïa ka Meghalaya State Olympic Association (MSOA) ba ki nongïalehkai ki ïoh ïa ka baibam naduh ki jingïalehkai ha ka jylla, ka ri bad shabar ri ruh.
