Shillong, Jylliew 26
Ka Mawphlang SC ka la bteng ïa ka jingjop kaba ar ha ka 4th Division Under-20 Football League 2025 ba la pynïaid da ka Shillong Sports Association (SSA) hadien ba ka la lah ban pynliem noh ïa ka Laitlulong SC da 4-1 kol ha ka Sngi Palei.
Kane ka nam jop ka la wan urlong lyngba ki saw kol ba la thep da u Phasdonlang Hynñiewta na ka bynta ban pynlong ïa katei ka kynhun ban bat ïa ka kyrdan ba hakhlieh jong ka Group-D ryngkat 6 point na ar sien ïakhun.
Kumba ka paw ha kane ka jingïakhun kaba la long ha SSA Stadium kaba ha First Ground Polo, ki rangïalehkai ka Mawphlang ki la lah ban ïalehkai bha naduh kaba sdang ha kaba u Phasdonlang u la ïoh ban thep ar kol ha ka kylla step kata ha ka minit kaba 18 bad 33, hynrei ka Laitlulong ka la lah ban pynphai kylla shi kol lyngba u Bankerlang Khardewsaw ha ka minit kaba 45.
Hadien ba la bteng biang ïa ka jingïakhun jong ka kylla miet, u Phasdonlang u la thep biang sa ar kol ha ka minit kaba 66 & 80+3 na ka bynta ban ïoh jingjop shisyndon.
Ha kawei pat ka jingïakhun jong kane kajuh ka group, ka Pommura ka la wanphai da ka jingjop hadien ba ka la lah ban pynliem noh ïa ka Mawpdang SC da 1-0 kol. Kane ka la wan urlong lyngba u Lekiwar Mukhim, uba la thep ha ka minit kaba 24.
Haba phai sha ka jingïakhun jong ka Group-B ka Lummawbah SC ka la pynliem noh ïa ka Nongkolew SC da 3-1 kol. Kane ka la wan urlong lyngba ki kol ba la thep da u Balajied Rangslang ha ka minit kaba 14, kumjuh u Kevin C Royne (35) bad u Fredy Ryntathiang (57). Hynrei ka Nongkolew ka la lah ban pynphai kylla shi kol lyngba u Joshwa Mukhim ha ka minit kaba 64.
Ka jingïalehkai ha ka Sngi Thohdieng kan long hapdeng ka Riatsamthiah SC pyrshah ïa ka Lawei SC ha ka por 10:30 mynstep, kumjuh ka New Challenger ïa ka Krang SC ha ka por 1:30 mynsngi bad ka Ïateilang SC ïa ka Mawnianglah SC ha ka por 4 baje janmiet.
