Shillong, Jylliew 26
Ka ïingbishar District and Session Judge ka la aibor 6 sngi ïa ki pulit ban tohkit ïa ki 3 ngut kiba la kynnoh donkti ban pynduh pyndam ïa ki sakhi-satar ha Indore, kiba don jingïadei bad ka jingshah pynïap jong u Raja Raghuvanshi ha ka thaiñ Sohra.
Ïa kane la pyntip da u Assistant Public Prosecutor u Tushar Chanda ha ka Sngi Palei hadien ba la ïalam ban tian bishar ïa ki hapoh ka ïingbishar.
Une u Assistant Public Prosecutor u la ïathuh ba ki Pulit ki la pan 8 sngi ban set ïa kitei 3 ngut ha along jong ki pulit (Police Custody) ban ïoh tohkit bniah hynrei ka ïingbishar ka la ai tang 6 sngi.
Ki 3 ngut ki kynthup ïa u Silome James, Balbir Ahirbar ba khot sin u Ballu bad u Lokendra Singh Tomar. Kine ki briew ki la wan poi ha thanat Sadar, Shillong ha ka Sngi Palei hadien ba ka kynhun SIT jong ki pulit ka Meghalaya ki la kem noh ïa ki na ka jingsuba ba ki donkti ban thang bad buhrieh ïa ki sakhi ha kaba ïadei bad ka jingshah pynïap jong u Raja Raghuvanshi.
U Silome James, nongdie ïing, u la shah kem halor ka jingkynnoh ba u pynjulor bad buhrieh ïa ki sakhi kiba kongsan, kynthup ka pistol shna hi, ka pisa, kiba don ha ka pla jong ka Sonam Raghuvanshi.
U Balbir Ahirbar, nongap pahara, la ngeit ba u don ïa ki jingtip kiba kongsan halor ka rung ka mih jong ki briew ba pynïap ïa u Raja Raghuvanshi ha ka ïing (flat) ba rieh ka Sonam Raghuvanshi hadien ba ka phet na Jylla Meghalaya.
U briew ba kem khatduh, Lokendra Singh Tomar, u dei u trai jong ka ïing sah wai ha Indore, ba rieh ka Sonam. Ïa une u briew la kem na Gwalior hadien ka jingphet rieh.
Kum ban shu pynkynmaw, u Superintendent of Police (SP) ka East Khasi Hills District, Bah Vivek Syiem, u la ong ba ki 3 ngut ki briew kiba la shah kem dang shen ha kaba ïadei bad ka jingshah pynïap jong u Raja Raghuvanshi ki donkti ban pynjah ïa ki sakhi.
U SP u la ong wat la ki pulit ki la duhnoh ïa ki sabut hynrei ki la ïoh ban shim ïa ki lyngkhot jong ki sabut ba la thang bad ba la phah sha ka Forensic ba kan peit bniah ïa kitei ki tiar ba la thang.
U la ong ruh ba ki don ki sakhi ba kine ki tiar ba la thang ki lah ban dei ka Phone hynrei ym don kino-kino ki dak ba ki lah ban dei ka pistol ne ki ksiar.
U SP u la ong wat la kitei 3 ngut kim donkti ha ka kam ban pynïap ïa u Raja Raghuvanshi hynrei ki donkti ban pynjot ïa ki sakhi bad u la ong ruh ba ki pulit ki don ïa ka sabut ba kine 3 ngut ki donkti ban rah ïa ka synduk ban buh ïa ki ksiar jong u Raja bad ka Sonam Raghuvanshi.
U la ong ruh ba ka lah ban dei ba kine kiba pynjah ïa ki sakhi ki kwah lalot haba ki ïohi ba ki don ki ksiar bad ki pisa ha ka synduk bad ki sa shim ïa ki khlem tip ba ki Pulit kin sa wad sabut ïa kitei ki tiar.
