Shillong, Jylliew 26
U Myntri Rangbah ka Jylla, Conrad K. Sangma ha ka Sngi Palei ka 26 tarik u Jylliew 2025 u la ïashimbynta lang ha ka jingrakhe ïa ka International Day Against Drug Abuse and Illicit Trafficking ha State Convention Centre kaba la pynlong da ka tnad Social Welfare ha ka jingïatreilang bad ki pulit ka Meghalaya, Meghalaya AIDS Control Society bad ka Drug Reduction, Elimination and Action Mission (DREAM) halor ka phangpdeng kaba ong, “Breaking the Chain: Prevention, treatment and Recovery for All.
Haba ai jingkren ha kane ka sngi, u Myntri Rangbah u la pynpaw ïa ka jingïohi jngai ha kaba ïadei ban khanglad ïa ka jingjyllei u drok ha ka Jylla. U la ban jur ba ka sorkar ka shimkhia ym tang ban khanglad hynrei ban pynduh pyndam noh syndon ïa u drok lyngba ka jingïatreilang na ka koit ka khiah, ki tnad pule, ki samla bad ka jingpynkhlaiñ ha kaba ïadei bad ka jingïatreilang bad ki paidbah.
U la ong ruh ba ym dei ban buh ïa kane ba tang ba la don ka aiñ ka la biang hynrei donkam ban ïakhun pyrshah ïa u drok da ka jingïatreilang bad baroh ki paidbah jong ka Jylla.
U Myntri Rangbah u la ïathuh ruh ha kaba ïadei bad ka jingpyrshang ki bor pulit ban khanglad ïa ka jingjyllei u drok ha kaba u la ong ba ha ki 3 snem ba la dep ki pulit ki la ïoh ban kurup haduh T.1000 klur ki jait drok ba kynthup ïa u Heroin, Ganja, Opium bad u Crystal Meth.
Nalor kata, u la ong ba la pynkhlaiñ shuh-shuh ïa ki ANTF, ki bor peitbniah ïa ki drok bad la nang pynrung shuh-shuh ïa ki Canine Squad.
U Myntri u la kyrpad ruh ïa ki nongshong shnong ka Jylla, ki jaka pule, ki nongïalam shnong, ki sengbhalang ba kin ïasnohktilang ban ïakhun pyrshah ïa u drok.
“Ki samla jong ka Jylla Meghalaya ki dei kiba kongsan bha, bad ngim dei ban ailad ïa u drok ba un tuh noh ïa ka lawei jong ki, ngin ïakhun pyrshah lang bad ngin sa ïoh ïa ka jingjop,” la ong u Conrad.
Ha kane ka sngi la wan ïashimbynta ruh da uwei na ki samla ba la lait na ka jingshah khum ha u drok uba la pynpaw bad ïathuh ïa ka jingïaid lynti jong u ha ka jingkyrni ïa u heroin haduh ba un da lah ban iehnoh shisyndon.
La leh burom ruh ha kane ka sngi ïa ki 20 ngut samla kiba la iehnoh ha ka jingkyrni dih drok kiba mynta ki la kylla long ki nongai mynsiem ïa kiwei pat ba kin iehnoh na ka jingkyrni ïa u drok.
