Shillong, Jylliew 26
Ki MDC ka liang pyrshah kiba kynthup ïa ka UDP, NPP, HSPDP bad u MDC shimet ki la duh ban ïashimbynta ha ka jingïatai kyllum ïa ka mang tyngka kaba la long ha ka Sngi Palei ha ka dorbar kaba khatduh jong ka Khasi Hills Autonomous District Council.
Kane ka jingduh ki MDC liang pyrshah ban ïatai ïa ka mang tyngka ka dei namar u shongknor Bah Strongpillar Kharjana u khlem shah ïa ki ban ïashimbynta namar ki khlem ai kyrteng ha ophis jong u hapoh ka por 4:00 baje janmiet hadien ba la wanrah ïa ka mang tyngka ha ka 24 tarik mynta u bnai.
U Shongknor u la pyntip ba kiba lah ban ïashimbynta ïa kane ka mang tyngka ki don tang san ngut bad kine san ngut ki dei tang ki MDC ka liang synshar.
Haba u shongknor u khlem shah ïa ki ban ïashimbynta, ki MDC ka liang pyrshah ki khlem mih jyndat shuh hynrei ki la mih uwei hadien uwei na ïingdorbar bad ki sa wan rung biang shwa ban kut ka jingjubab u Executive Member ka tnat pla tyngka u Bah Seiborlang Warbah.
Haba ki MDC ka liang pyrshah kim ïoh ïashimbynta, ki MDC ka Voice of the People Party ki la ïoh ban ïashimbynta ha ka jingïatai kyllum ïa ka mang tyngka jong u snem 2025-26 ha dorbar ka Khasi Hills Autonomous District Council, ki la ai jingïaroh ïa ka Executive Committee kaba la thaw ïa ka Recruitment Committee na bynta ban plie lad ïa ki samla kiba wad kam.
Ka jingïoh ïashimbynta kham bun ngut ki MDC ka VPP kaba don ha liang synshar ka dei namar ki MDC ka liang pyrshah ki khlem ïoh ban ïashimbynta namar u shongknor u khlem shah ïa ki namar ki khlem ai kyrteng hapoh ka 4 baje janmiet jong ka 24 tarik mynta u bnai hadien ba u executive member ka tnad pla tyngka u la wanrah ïa ka mang tyngka.
Na ka liang u MDC shimet na Rambrai Jyrngam, Bah Lurshai Kharbani, u la kyntu ïa ka Executive Committee hapoh ka jingïalam ka VPP ba kin ïa klet noh ïa kaei kaba la dep hynrei ki dei ban sdang thymmai nangne shakhmat.
Kane ka jingpynpaw u Bah Lurshai ka dei haba u wanrah ïa ka mat jingïakren (cut motion) halor ka jingmang pisa ha ka tnat Legislative jong ka Khasi Hills Autonomous District Council.
U Bah Lurshai u la pynpaw ba u la ïohi ha kine ki sngi ba ki samla ki hap ban leit sha ïingbishar hadien ba la shah pynsangeh ïa ka kam ka jong ki hynrei kane kam dei ka jingbakla jong ki samla ka dei ka jingbym biang ka rukom thungkam.
Kumta u la kyntu ïa ka EC ba lada ki kwah ban pynkylla dei ban sdang ïa kaba thymmai ym dei ban khyllie ïa kaba la dep.
Ha kane ka sngi kut jong ka dorbar ka KHADC, u Bah Lurshai Kharbani u la ïoh ban wanrah haduh 9 tylli ki cut motion ban ïakren ïa ka jingtreikam jong ki tnat bapher-bapher.
