Shillong, Jylliew 26
Ka tamasa ïa tem ïa put ka ban long ar sngi kynthih kaba la sdang naduh ka Sngi Palei ka 26 tarik bad kan kut lashai ka sngi ka 27 tarik Jylliew 2025 kaba la jer kyrteng kum ka National Tribal Music Festival 2025, ka ‘Rasong’ la wan ban plie paidbah da u Myntri ka tnad Jngohkai Pyrthei ka Sorkar Jylla, Bah Paul Lyngdoh kum kongsan ryngkat ka jingsakhi lang ka Director jong ka Arts and Culture, Kong I. Majaw.
Ki saw kynroh jong ka U SoSo Tham Auditorium ha kane ka sngi ki la sawa da ki jingput jingtem bad ki sur jingrwai jong ki jaitbynriew riewlum na 11 tylli ki jylla ri thor kumjuh na ki jylla thaiñ shatei lam mihngi jong ka ri India kynthup ruh na ka jaitbynriew riewlum kiba shong ha ka Jylla Meghalaya.
Ha kane ka sngi la sakhi da ka jingïadonlang ki paidbah ym tang napoh ka Jylla hynrei ki paidbah na kiwei ruh ki jylla.
Haba ai jingkren ha kane ka sngi, u Bah Paul u la pynpaw ka jingsngew sarong kum u trai ri bad ka jingsngewkmen ban ïoh ïashimbynta ha kane ka prokram.
U la ong ruh ba “katta phin nang wan ban jngohkai bad wad shaphang ki lum Khasi katta phin nang shem, ba ki lum Khasi ki sawa da ki sur jingrwai.”
Shuh shuh u la ong ba ka kyntien ‘Rasong’ ka pynkynmaw ïa u ïa kawei ka kot kaba la thoh ïa ka ese ‘Ban pynïeng Rasong’ kaba la thoh da u Bah R.T. Rymbai kaba kren shaphang ka jingriewspah kam kolshor bad kiwei-kiwei jong ka ri lum Khasi.
“Ka sur jingrwai ka dei ka jingbam ïa ka met bad ka mynsiem bad ka pynjahthait ïa ka jingmut jingpyrkhat,” u la ong.
Ha kane ka sngi la sdang ban pynphuh-pynphieng da ki sur jingrwai kiba bang bad sngewtynnad, ka put ka tem na ki jaitbynriew na kylleng ka Jylla Meghalaya, ki trai ri trai muluk bad ruh da ka jingtem ïa ka bom da u Myntri ka sorkar ïa ka jingrwai ieit ri jong ka Jylla Meghalaya.
