Shillong, Jylliew 26
Ha ka jingkylla kaba phylla ha shwa ka jingïalehkai jong ka UEFA Women’s Euro 2025, ka Switzer-land ka la mad ïa ka jingshah rem haduh 7-1 kol ha ka kynhun ki rangïalehkai Under-15 jong ka Luzern ha ka jingïalehkai paralok hapoh ka stadium kaba thylli.
Ïa kane ka jingïalehkai la pynïalehkai ha ki lai tylli ki bynta kaba 30 minit, ka dei kaba la thmu ban pynlong ha kaba jar-jar, hynrei kane ka la saphriang ha rynsan lad pathai.
Katkum ka khubor kaba la saphriang ha Swit-zerland, u rangïalehkai ka Luzern u la buh ïa ki ‘video clip’ na katei ka jingïalehkai ha ka TikTok, kaba la pynpaw ïa ka jingïalehkai ka bym sngew lah ngeit. La ïathuh ba katei ka durkhih, kaba la pyni ïa ka ‘thei ïalehkai shakhmat jong ka Juven-tus, ka Alisha Lehmann bad ka paralok ïalehkai ka Alayah Pilgrim, la ïathuh ba ki la don palat 70,000 ngut kiba la peit ïa ka durkhih ha shwa ban weng noh ïa ka. Ka Lehmann ka dei kawei na ki ‘thei ïalehkai ba paw ha ka phutbol ki kynthei, ha kaba ka don haduh 17 million ngut ki nongbud (follower) ha ka Instagram.
Kane kam dei ka sien kaba nyngkong ba ka kynhun ki kynthei jong ka Switzerland kan mad ïa ka jingshah rem ha ka kynhun ka liang pyrshah kaba long shi bynta ban pynkhreh ïa ka Euro. Ha ka jingïalehkai kilanmet jong ki, mynshwa ki la shah rem noh da 2-1 kol ha ka kynhun ïalehkai U-15 jong ka FC Solothurn, hynrei ki la lah pat ban tam ïa ka Under-15 jong ka FC Biel da ka jingjop 2-1 kol.
Watla ka jingmih ka lah ban long kaba sngew lyngngoh ïa kiba bun, hynrei ka Swiss Football Association ka la pynpaw halor kane ka jingshah rem. U nongaiktien katei ka kynhun, Sven Micosse, u la pynshai ïa ka jingthmu jong kine ki jingïalehkai da kaba ong, “Kam long kaba thymmai ha ka phutbol jong ki kynthei ban ïakhun pyrshah ïa ki kynhun kiba dangrit. Ka thong ka long ban wanrah ïa ka bynta kaba ïakhun bad ka jingjngai. Ka jingpyrkhat ha kane ka bynta jong ka jingpynkhreh ka long ha ka liang ka met. Watla ka long kumno-kumno ruh, kine ki jingïalehkai kilanmet ki ïahap bha bad ki jingïalehkai ha ka pyrthei jong ngi ha ka liang ka jingkhlaiñ bad ka jingjngai.”
Kumba ka paw, ka Switzerland ka la rung sha ka Euro 2025 kum ka nongpynïaid ïa kane ka lympung ïalehkai, ha kaba kan ïakhun pyrshah ïa ka Norway ha ka 2 tarik u Naitung.
