Shillong, Jylliew 26
Ki nongïalam jong kiba shong die madan ha Khyndai Lad ryngkat ka jingwan synran lang ka Kong Angela Rngad ha ka Sngi Palei ka 26 tarik u Jylliew 2025 ki la leit ban ai da ka jingthoh sha u Chairperson ka Provisional Town Vending Committee (PTVC) ban pyrshah halor ka jingwan pyrta da ka tynghung ha Khyndai Lad ban hukum ïa baroh kiba shong die madan ba kin kynriah noh.
Kane ka jingwan pyrta da ka tynghung ka dei ha ka step Sngi Palei jong ka 26 tarik ha ka por 10 baje eiei, da kaba pynsngew sha baroh kiba shong die madan ha Khyndai Lad ba kin sngewbha ban kynriah noh na katei ka jaka sha MUDA bad ka sorkar ka la aipor ruh haduh ka 22 tarik u Naitung.
Haba ïakren bad ki lad pathai khubor, ka Kong Angela Rngad, dkhot jong ka Provisional Town Vending Committee (PTVC), ka la ong ba baroh kiba shong die madan ha Khyndai Lad ngi pynpaw ïa ka jingpyrshah halor kane ka hukum ka sorkar ban pynkynriah jubor sha MUDA.
Ka la ong ruh ba kam pat don ka Town Vending Committee hynrei ka dang don tang ka Provisional Town Vending Committee kaba la thaw myn ha ka 13 tarik u Nohprah 2022.
Ka la ong ba ka Meghalaya Greatest Shillong Progressive Hawkers and Street Vender Association (MGSPH&SVA) ka la jop ïa ka mukotduma ha ïingkashari kaba la bthah ïa ka Sorkar Jylla ba ka dei ban pyntreikam ïa ka aiñ Sorkar India kaba batai shai kumno ban pynbeit bad ki kam kiba ïadei bad kiba shong die madan.
Ka Kong Angela ka ong ba lada ki bor sorkar kin wan ban kyndang da ka bor ïa ki nongshong die madan ha Khyndai Lad kin ïeng ban ïaleh pyrshah beit bad ban pynlong ruh da ka jingïakhih.
Kane ka jingpynkyndeh jong ka Sorkar Jylla ïa kiba shong die madan ba kin mih noh na Khyndai Lad ka wanlam sha ka jingma namar i la don ruh iwei longkmie i ba la kyllon ha madan namar ka jingkyndit halor kane ka hukum, da kaba ong ba ka sorkar kam dei ban leh kumne, haba ngi la ïaid da ka aiñ ngin ïaid da kaba jai-jai katkum ki kyndon, da kaba bynrap ruh ba ïa kane ngim pat rai ha ka Provisional Town Vending Committee bad ka long beaiñ.
“Bad wat ka jingpyntip ba la mih naduh ka 22 tarik u Naitung ba kiba shong die madan kin hap rung noh shapoh MUDA, kane ruh ka long beaiñ namar ki leh mynleh da ka ‘Notice’ ba mih na ka Town Vending Committee bad kam shym don ka Town Vending Committee (TVC) hynrei ka don tang ka Provisional Town Vending Committee (PTVC),” ka la ong.
Ka la ïathuh ruh ba khlem pat rai hapoh ka PTVC ban shna ïa ki dukan ha MUDA ban phah shong ïa kiba shong die madan ha Khyndai Lad bad ki dukan kiba la shna ruh ki long kum ki jaka ri ksew kaba pynpaw ruh ïa ka jingibeiñ, ka jingkheiñ poh ïa ki nongdie madan bad ka long beaiñ.
Kumta ka la kren da kaba shai ba lada ka sorkar ka kwah ban pynkynriah ïa kiba shong die madan kin ai ka jaka kaba kylluid bad kaba biang ba kin shong. Hynrei lada kim leh kumta, ngin ïeng beit ban pyrshah namar ngim dei ki nongpynkheiñ aiñ bad ngin ïaid katkum ka aiñ thik-pa-thik katkum ki kyndon ban pyrshah ïa ka sorkar.
