Shillong, Jylliew 26
U Executive Member ba dei peit ïa ka tnat Khaïi ka KHADC, Bah Winston Tony Lyngdoh, u la pyntip ba ka Executive Committee ka dang ap ïa ka shithi na u Deputy Commissioner ka Ribhoi District halor ka jingshah pynsangeh ka khyrdop lum khajna (Check gate) kaba la pynïeng ha Umdihar, Ribhoi District.
Ïa kane, u Bah Winston u la jubab dei halor ka jingkylli bynrap na u nongïalam ka liang pyrshah u Bah Titosstarwell Chyne uba kwah jingshai halor ka jingshah khang ka khyrdop lum khajna ïa ki kali kiba kit mar ki mata ki bym biang ki kot ki sla.
U Bah Titos u la buh ïa ka jingkylli bynrap ka dei na ka jingkylli ba la buh da u MDC ka Sohïong-Nongspung Bah Synshar L Thabah ha ki kynta kylli jingkylli ha dorbar mangtyngka kaba la kut noh ha kane ka sngi halor ka jingdon ki check gate, ki toll gate bad ki forest gate.
U Bah Winston u la jubab ruh ba ka council mynta ka dang phah sangeh noh ïa katei ka khyrdop lum khajna ha Umdihar naduh ba la shah khang ha ki bor district ka Ribhoi bad mynta ki dang ap ïa ka shithi na u DC Ri-Bhoi ban ïoh jingshai.
U la ïathuh ba ka Executive committee kam shym la ai jingpynbna ne khot tender ïa ki khyrdop lum khajna namar ka por ka khim palat.
Kane ka jingjubab ka dei halor ka jingkylli ba la wanrah da u MDC ka UDP na Sohïong-Nongspung constituency Bah Synshar Lyngdoh Thabah uba la buh jingkylli la ka executive committee ka ai jingpynbna ne em ban khot tender ha ki kot khubor ne ki electronic media ba kin thep ïa kine ki khyrdop lum khajna.
U la buh jingkylli biang ba lada khlem ai ka jingpynbna kane ka pyni ba ka EC ka shu jied tang ïa ki briew kiba wan ïakynduh ïa u EM.
U Bah Winston u la ïathuh ba ka Executive Committee ka khlem ai jingpynbna namar ka por ka la khim namar la donkam ban pyndep noh, kumta la jied tang kito kiba la phah shithi kiba la lah ban buh dor kaba heh ban pynïaid ïa ki khyrdop lum khajna.
