Shillong, Jylliew 26
Ki kam tuh kam thiem ki dang ïai bteng na kawei ka sngi sha kawei pat bad kane ka la wanrah ïa ka jingsyier bad jingbym shngaiñ shuh ha ki trai ïing ne ki trai dukan.
Katkum ka khubor ba la ïoh na ki pulit la ong ba u Surinder Singh Yadav u la ai ka jingujor ba ha ka 20 tarik mynta u bnai, ki runar bym lah ban ithuh, ki la prong tuh hapoh ka ïing ka jong u, kaba don ha Lower Lachumiere, Shillong bad ban tuh ïa kawei ka tyndong lyer shet jingshet (LPG cylinder) bad ka pisa kaba long T.6,000/-.
Ha kawei pat ka khubor, u Bah Donkupar Rynjah u la ai ka jingujor ba ha ka 22 tarik mynta u bnai, ki runar bym lah ban ithuh ki la prong tuh hapoh ka ïingsah jong u, kaba don ha Laban, Shillong bad ban tuh ïa ka pisa kaba long haduh T.1.5 lak.
Ha kawei pat ka khubor, u Satyam Yadav u la ai ka jingujor ba ha ka 23 tarik mynta u bnai, ha ka por kumba 5 baje janmiet, ki runar bym lah ban ithuh ki la tuh ïa ki waïar kiba shongdor haduh kumba T.73,500/- na ki smart pole kiba don ha Barik Point, Shillong.
Ha kaba ïadei bad kine ki kam shah tuh, na ka liang jong ki pulit mynta ki dang pynlong ka jingtohkit ban lap ïa ki jingshisha kumjuh ban thwet ïa ki briew kiba donkti ha kane ka kam tuh.
