Shillong, Jylliew 26
Kum shi bynta ka jingrakhe ïa ka sngi pyrshah ïa ka jingdih drok bad ka jingkhaiï beaiñ, ka Press Information Bureau, Shillong, ha ryngkat ka jingïatreilang bad ka ophis jong u Commissioner, Customs (Preventive), NER Headquarters, Shillong, ka la pynlong ïa ka jingïakren bad ki lad pathai khubor hapoh ka lama jong ka ‘Varta’ ha CGST Hall, Shillong ha ka Sngi Palei jong ka 26 tarik Jylliew, 2025.
Kane ka prokram ka la wanrah lang ïa ki heh ophisar na ka tnat Customs bad ki dkhot jong ki lad pathai khubor na ka bynta ka jingïakren kaba bniah halor ka jingkiew jong ki jingma na ka jingkhaïi ïa u drok ha ka thaiñ shatei lam-mihngi bad ki lad pyntreikam ba la shim ban ïakhun pyrshah ïa ki.
Haba ai ka jingkren kaba bniah, u Bah Spencer M Mylliem, Joint Commissioner, Customs, u la pynshai halor ki jinglong ba dang shen ha ka jingwan rung ki drok na ka ri marjan kum ka Myanmar, da kaba pynpaw kumno kane ka thaiñ ka nang kham shah pyndonkam kum ka lynti ïaid bad ruh kum ka lynti pyndonkam ïa u drok.
U la batai ïa ki rukom ha ka jingkhaïi ïa u drok, ki kam rukom treikam ba kongsan, ki jingkurup kiba heh, bad ka bynta kaba kongsan jong ka jingïatreilang hapdeng ki tnat.
“Ka thaiñ ka sakhi ïa ka jingkiew ha ka jingkhaïi tuh ïa u drok, khamtam ïa u drok amphetamine, uba la khaïi bunsien na Myanmar. Kane ka ïadei bha bad ka jingbym shong shngaiñ ha ka saiñ pyrthei ha ka thaiñ bad ki jaka khappud,” la ong u Bah Mylliem.
U Joint Commissioner u la pynshai ba ka Customs (Preventive) NER ka la pynkhlaiñ ïa ki jingpyrshang lyngba ki lad ki lynti bapher bapher ha kylleng ki jylla ka thaiñ shatei lam-mihngi. U Bah Spencer u la ong ba ka tnat jong ki, ka shaniah shibun ha ki nongpyntip, ki rukom ai khusnam, bad ka jingïatreilang hapdeng ki tnat, katba u la bynrap ba ki ophisar jong ka Custom ha kylleng ka thaiñ shatei lam-mihngi ki la leh ïa ki jingkurup kiba kongsan ha ka jingïatreilang bad ki BSF, ki Assam Rifles bad ki bor pulit jong ka jylla, kaba pynlah ban pynlong ïa ki jingtohkit lang bad ban buddien.
“Ka jingpyrshang pyntreikam jong ngi ka shong ha ka jingstad ha ka por bad ka jingïatreilang kaba khlaiñ bad ki tnat ba ïatreilang. Ki jingïalang ba manla ka por bad ki jingtreikam lang ki long kiba kongsan bha,” u la bynrap.
Ka jingpyni ka la pyni ïa ka jingdro (map) jong ki lynti ïaid kjat ba kongsan ha kylleng ka thaiñ shatei lam-mihngi bad ka la pyni ïa ki katto-katne ki jingjia ba la kem dang shen.
U Bah Mylliem u la ban jur ba ki jingtreikam jong ka Custom, watla ki long kiba la pynjari da ka jingpyntreikam, hynrei ki ïoh ka jingkyrshan ruh da ki jingpynsngewthuh paidbah bad ka jingleit sha ki paidbah.
“Ka jingthmu jong ngi kam dei tang ban tehlakam ïa ka jingpynbiang hynrei ban pynduna ruh ïa ka jingdawa. Ki buit treikam kiba jrong ki dei ban kynthup ïa ka jingpynbha, ka jingpynkylla ïa ka aiñ, bad ka jingïatreilang bad ki paidbah,” u la ong.
“Tang ki Custom kim lah ban ïakhun ïa kane ka thma. Ka donkam ïa ka jingkyrshan bad jingïatreilang kaba neh na baroh ki bor pynjari aiñ bad ki bor khappud, ha ka ri bad ha ka pyrthei.”
Ha kane ka sngi la don lang da ki heh ophisar jong ka Custom ba kynthup ïa u Deputy Commissioner, u Bah Hajong bad u Assistant Commissioner, u Bah Rasarshi Chakrabarty, nalor ki ophisar na ka PIB bad ki nongmihkhmat na ki lad pathai khubor bapher bapher. Ha kane ka jingïalang ïakren la ïohi ïa ki jingkylli ba la buh halor ki lynti khaïu pateng kiba dang mih, ka jinglong mynta ha Meghalaya, ka jingdonkti jong ki bar jylla, ki kynhun shna tiar beaiñ, bad ki jingpyrshang ban ïatreilang hapdeng ki ri lyngba ki network kum ka Customs Overseas Intelligence Network. Ka jingkylli kaba kongsan ka dei kaba ïadei bad ka aiñ ban ïada na ka jingkhaïi beaiñ ïa ki dawai pynbuaid bad ki dawai pynbuaid, 1988 (PITNDPS Act).
Haba jubab, u Bah Spencer M Mylliem u la ban jur ba ka PITNDPS Act ka dang long ka atiar aiñ kaba khlaiñ bha, khamtam ha ki mukotduma kiba ïadei bad ki nongleh kam sniew kiba ju leh bad kiba don jingïadei bad ki kynhun khaïi drok ba la pynbeit. La pynpaw ruh ïa ka jingsngewkhia shaphang ka jingduna bor briew, bad ka jingshah rai pynrem. Kum shi bynta ban rakhe ïa kane ka sngi, ka Ophis Heh jong ka Custom, Shillong ka la pynlong ruh ïa ka jingïakob thoh Slogan/Poster bad ka jingïakop thoh poitri halor ka phang pdeng “Mission – Drug Free Campus.” Ki khynnah skul na ki phra tylli ki skul ba pawnam-ka Loreto Convent, ka Shillong Public School, ka St. Edmund’s Higher Secondary School, ka Army Public School bad ka Duncan Secondary School kiba iashim bynta ha katei ka prokram.
Ki khynnah samla kiba la ïashimbynta ki la pynpaw ïa ki jingmut bad ki jingsngew jong ki halor ki jingma kiba mih na ka jingdih drok lyngba ka dur kaba donbor bad ka poitri kaba ktah ïa ki mynsiem bad ki dohnud.
