Shillong, Jylliew 26
Ka Hynñiew Trep Youth Council (HYC) Mawlai Circle ha ka Sngi Palei ka la sdang ïa ka lympung phutbol ba la tip kum ka 1st Tur Shaphrang Knock-out Tournament 2025 ha Madan Heh Mini Stadium kaba ha Mawlai Phud-muri. Kane ka long shi bynta ban ïasnohkti lang ha ka ban rakhe ïa ka International Day Against Drug Abuse and Illicit Trafficking.
Ïa kane ka lympung kaba la pynlong kyrpang na ka bynta ki khynnah pule Secondary bad Higher Secondary School la wan plie pyrda da u Bah Khrawkupar Syiemïong na ka Sur Jingkyrmen Society kum kongsan ha ka jingdonlang ki dkhot nongkitkam jong ka HYC.
La plie pyrda ïa kane ka lympung da ka prokram kaba lyngkot ryngkat ka phang kaba ong “Say No to Drugs, Yes to Football” kaba mut “Ong em ïa u drok, Hooid ïa ka phutbol”. Ïa ka jingïalang la pynïaid da u Bah Drallingstar Ïawphñiaw, Sports Secretary HYC. La ïoh ka jingkren lyngkot na u Bah Rhemdor G. Saibon, General Secretary jong ka HYC Mawlai, nangta na ka Kong Mitsi Nongrum, Counsellor ka MACS bad khatduh na u Bah Khrawkupar Syiemïong.
Ha kane ka lympung la wan shim bynta da 13 tylli ki kynhun na kylleng ka nongbah. Kumta ha ka jingïalehkai jong kane ka sngi sdang ka Seng Samla Mawlai Phudmuri (SSMP) ka la ïoh jingjop hadien ba ka la lah ban pynliem noh ïa ka Mawkhar Christian HSS da 3-0 kol.
