Shillong, Jylliew 26
Ka lympung ïalehkai chess ba la tip kum ka 48th Meghalaya State FIDE Rating Chess Championship 2025 ka la sdang ha ka Sngi Palei ha Khasi National Dorbar Hall, Shillong ha kaba la wan shim bynta da 111 ngut ki nongshim bynta na kylleng ki district jong ka Jylla.
Ïa kane ka lympung ïalehkai kaba lai sngi lynter la pynlong da ka East Khasi Hills District Chess Association (EKHDCA) hapoh ka jingkhmih da ka Meghalaya Chess Association (MCA) bad la kyrshan lang da ka tnat ïalehkai jong ka Sorkar Jylla.
Ïa kane ka lympung la wan ban plie da ka Vice Chancellor jong ka Martin Luther University, ka Prof. T.K Kharbamon ha ryngkat ka jingïadon lang ki nongïalam ka President of the Meghalaya Chess Association (MCA) Bah K.M. Warjri, kumjuh u T.H.B Singh, u General Secretary ka MCA Bah K. Joe Pajat, ki dkhot nongkitkam ka EKHDCA bad kiwei-kiwei.
Ka jingthmu jong kane ka lympung ka long ban jied ïa ki 4 ngut nongïalehkai kynsai (top four) ban mihkhmat ïa ka Jylla sha ka 62nd National Chess Championship 2025 kaba la thmu ban long ha Vijayawada kaba ha Andhra Pradesh ha u Nailar mynta u snem.
Kat kum ka jingpynpaw jong u Bah K. Pajat la ong ba ha kane ka lympung la shah tang hynriew ngut ki nongïalehkai ban shim bynta na kylleng ki district ha kane ka lympung, hynrei ka East Khasi Hills kaba pynlong ïa kane ka lympung ka ïoh ïa ka kabu ksiar ban jied katba ka mon ïa ki nongïalehkai ba kin shim bynta ha kane ka lympung.
Ïa kane ka lympung yn pynkut ha ka Sngi Saitjaiñ bad la khmih lynti ba ka Jylla kan lah ban sei ïa ki nongïalehkai kiba kynsai na kane ka lympung bad ruh ba kin ïoh mihkhmat sha ka National Chess Championship.
