Nongpoh, Jylliew 26
Ki nongïalam jong ka shnong Umdihar ha ka miet sngi Balang, ki la leit ban aiti noh ïa u samla Mebanker Syngkli uba ju tip ruh kum u Banker sha ki bor pulit jong ka thanat Nongpoh hadien ba ki la dep ban tohkit bad lap ba u dei uba la donkti ha kiba bun ki kam tuh kam thiem bad ki kam kiba wanrah jingkulmar hapoh ka shnong ka thaw.
Kum ban shu kdew, ïa u samla Banker Syngkli, la ïoh ban kem nyngkong da ki nongïalam ka shnong Pahamsyiem katba u dang leit dawa pisa na ki dukan ha kyrteng jong ka Ri Bhoi People Movement (RBPM). Kumta na ka liang ka shnong Pahamsyiem hadien ba ka la dep ban tohkit bad bishar, ka la aiti noh ïa utei u samla sha shnong Umdihar, kaba dei ka shnong trai jong u.
U Rangbah Shnong ka Umdihar, Bah Romel Lyngdoh, u la ïathuh ba hadien ka jingwan aiti ka shnong Pahamsyiem, na ka liang ka shnong Umdihar ka la rah ïa utei u samla sha ïingdorbar jong ka shnong ban kylli bad tohkit ïa u. U Bah Romel u la ïathuh ba utei samla, u la phla ba u la donkti shisha halor kane ka kam dawa pisa bad phla ruh ba u la donkti ban prong bad tuh ïa ki tiar ki tar bad pisa na ka ïingmane jong ka Balang Presbyterian Umdihar myn ha u bnai Jymmang 2024.
Shuh shuh, na ka liang u Bah Romel Lyngdoh u la ïathuh ba na ka liang ka shnong ka lap la bunsien ïa utei u samla bad ha ki por kiba la dep, ki la sneng la kraw ïa u, hynrei haduh mynta um shym la kylla satia ka jinglong bad dei halor kata ka nongrim ba ka shnong ha ryngkat bad ki samla shnong, ki la rai ban aiti noh sha ki bor jong ka aiñ ban leh ïa kaba donkam.
