Shillong, Jylliew 26
Hadien ba ka shlem treikam jong u Commissioner ka tnad Transport ka Sorkar Jylla ka la pynmih ïa ka hukum na bynta baroh ki kali kamai kin hap ban pyndait ïa u Vehicle Location Tracking Device, ka la mih shibun ka jingpyrshah na ka liang ki kynhun nongñiah kali kamai bapher-bapher hapoh ka Jylla namar kim sngewïahap ïa kane ka hukum.
Kumjuh, na ka liang ka Synjuk Ki Nongñiah Taxi Sor bad Khapsor (SKNTS&K) ki la pynpaw ïa ka jingpyrshah kaba jur halor kane ka hukum.
Ka synjuk hapoh ka jingïalam jong u Bah Denzil Nongkynrieh kum Secretary, ha ka Sngi Palei ka 26 tarik u Jylliew 2025 ka la leit ban ïakynduh ïa u Commissioner ka tnad Transport u Davis D. Sangma ban pan jingpynshai halor kane.
Haba ïakren bad ki lad pathai khubor, u Bah Denzil u la ong ba ka jingpyrshah ka kynhun halor kane ka hukum ka dei namar ba ka dor jong u Tracking Device ka long kaba la rem shaba palat da kaba kdew ruh ba u shongdor haduh kumba T. 9,500 tyngka uwei, hynrei u la pynpaw pat ba na ka liang u Commissioner u la ong ïa mynta kane ka treikam tang ïa ki kali sorkar.
“Ha ka jingïakynduh ka seng ka la ai jingmut ïa ka sorkar ba ha ka jaka jong u Tracking Device ka dei ban don da ka ‘apps’ ka ban pyntikna ba ki briew kiba wan nabar kin hap ban register ne pynrung kyrteng shwa ïalade shwa ban rung shapoh ka Jylla Meghalaya,” la ong u Bah Denzil.
U la ong ruh ba lada ka sorkar kan buh noh da ka ‘apps’ kan pynsuk bha ïa ki briew ba wan nabar namar mynta ka ‘technology’ ka la kiew sted bha bad kan pynsuk khamtam ïa ka tnad pulit ban wadbniah kum ka jingjia ha Sohra kaba dang shu jia shen.
Kumta u la kyrmen ruh ba ka sorkar kan pdiang ïa kane ka jingai jingmut jong ka seng.
Haba ïadei bad kane ka jingwanrah hukum ka sorkar ba baroh ki kali kamai kin pyndait noh da u Vehicle Location Tracking Device, ka seng hi ka pyrshah beit halor kane.
