Shillong, Jylliew 26
Ha ka step jong ka Sngi Palei, ar ngut ki dkhot ka seng kieng atiar jong ka Hynñiewtrep National Liberation Council (HNLC) ki la wan ban pyndem wait noh ïalade hakhmat u Superintendent of Police (SP) ka Eastern West Khasi Hills District.
Kine ar ngut kiba la wan pyndem noh ïalade hakhmat ki pulit ki kynthup ïa u Dibarius Jyrwa, 32 snem ka rta bad u Ridor Lyngdoh Nonglait, 30 snem ka rta kiba dei napoh katei hi ka district.
Ha ka kyrwoh khubor ba la pyllait da u SP u la ïathuh ba ha ka jingtohkit sdang kaba la pynlong, kitei baroh ar ngut ki dkhot ki la phla ba ki la shah ïalam bakla ha uwei ba la tip kyrteng kum u Samuel Wahlang Pahsyn -tiew, uba shah thwet ha ki pulit halor ka jingdonkti pynbthei bom IED ha Shillong Syndicate Bus Stand, ban pynïasoh sha ka HNLC bad baroh lang ki la phet sha Bangladesh.
Shuh shuh ki la phla ba ha kane ka jingpynïasoh bad ka HNLC, la ai ha ki ban trei ki kam ba poh kynthup ruh ïa ka kam rep kam riang, kaba na ka liang jong ki, ki la pynpaw ba kine ki kam kim ïahap satia bad kaei ka jingthmu bad nongrim jong ka seng.
Kitei ar ngut ki la ïathuh ba ha ki 15 tylli ki bnai kaba ki la don bad ka HNLC, ki la duh jingkyrmen bad ym sngewtynnad ne sngewhun ïa ka kam ba la aiti ha ki da ki nongïalam ba la kham rangbah jong ka HNLC. Dei halor kane ba ki la rai ban phet krad na Bangladesh ha ka 20 tarik mynta u bnai, da ka jingthmu ban wanphai biang sha ka jingim ba manla ka sngi jong ka imlang- sahlang bad ruh ban pynpaw ba ki la don ka jingbabe ba leit pynïasoh bad ka HNLC.
