Jowai, Jylliew 26
Hadien ka jingjynrat naphang ïa ki tynrai dieng ba la thung beaiñ da ki Karbi hapoh u pud u sam jong ka shnong Lapnagap, ki nongshong shnong Lapangap ki la dap mynta da ka jingkhuslai ba hato kin ïoh ne em ban leit rep leit riang da kaba suk ba saiñ namar ba ki Karbi ki la thang ïa ki ïingtrep bad byrngem ban pynthut ïa ka jingleit rep leit riang ha ki pynthor kba kiba don markhap bad ka shnong Karbi kaba tip kum ka Tahpat.
Haba ïakren bad u Waheh Shnong Ma Deimonmi Lyngdoh, u la ïathuh ba ka dorbar shnong ka kyntu kynpham ïa ki nongshong shnong ba kin ym pat leit rep leit riang sha ki pynthor namar ba ka jinglong-jingman kam pat shngaiñ hadien ka jingjia kaba la jia ha ka sngi Balang.
U la kyntu ruh ïa ki bor pynïaid District bad ka Sorkar Jylla ba ka dei ban pynbiang ïa ki bor pahara kiba biang bad kham pynbun ki pulit ban synran ïa ki nongrep ha ka por ba ki leit rep leit riang sha kitei ki jaka pynthor kiba don markhap bad ka Tahpat.
Ha kawei pat ka liang, u waheh shnong u la ïathuh ba ki nongshong shnong ki la pyntip sha u ba ki pulit Assam ki la wan poi ha katei ka jaka ïakajia da ki phew kali bad ki la sdang shna ruh ïa ki kynja sem ha katei ka jaka.
U la kyrpad ïa ka Sorkar Jylla ba ka dei ban phah mih ïa kitei ki pulit Assam na katei ka jaka khnang ba kin ym ïoh lad satia ban shna ïa ka ktem kaba pura kumba long ha kiwei pat ki jaka ïakajia khappud.
Shuh shuh u waheh shnong u la ïathuh ruh ba nalor ki pulit Assam, ki paidbah Karbi ruh ki la ap pahara ha katei ka jaka.
