Agartala, Jylliew:
Ki bor ba dei khmih, ki la pynpaw ïa ki jingeh kiba jur bha hajan ka kad liengsuiñ jong ka Maharaja Bir Bikram (MBB), Agartala, ha Tripura, hadien ka jingïalang jong ka Airfield Environment Management Committee (AEMC) kaba la long dang shen ha katei ka kad liengsuiñ.
Ki mat ba kongsan ki kynthup ïa ki jingtei kiba jrong khlem jingbit, ki dukan doh kiba khring ïa ki sim, bad ki jingeh ha ka liang ka jingïada hajan khappud jong ka Bangladesh.
U heh sorkar u la pynthikna ba katto katne ki ïing ha kylleng ka kad liengsuiñ ki la pynkheiñ ïa ki kyndon jingjrong ba la buh.
“Kine ki jingtei ki buh jingma iï ka jingtreikam jong ki liengsuiñ. Yn pynpoi ïa ki jingpynbna sha ki trai jaka kiba ïadei kam,” la ong u heh sorkar.
Nalor kata, la ithuh ba ki don katto katne ki dukan die doh ha ki jaka ba marjan kum ki nongsam kiba khring ïa ki sim kaba ju jia man ka por hajan ka jaka ïaid liengsuiñ.
Ka jingthombor jong ki sim, kaba ju mih na ka jingtuid ki jaboh na kine ki jaka treikam, ka long ka jingma kaba nang jur ïa ki liengsuiñ ha ka por ba ki kiew bad hiar.
Ka komiti ka la tyrwa ban thaw ïa ka jaka ban lait na ka jingher jong ki sim kaba 10 kilomitar ha kylleng ka kad liengsuiñ.
Ki lad ki lynti kin kynthup ïa ka jingpyndonkam kaba pyrkhing ïa ki jaboh, ka jingpynkynriah ïa ki dukan doh, bad ka jingpynneh ïa ka jingkhuid jingsuba ban ïada na ka jingïalum lang jong ki sim.
Kawei pat ka jingsngewkhia kaba la pynpaw ha kane ka jingïalang ka dei kaba ïadei bad ki nongleh bymman ha kylleng u pud u sam jong ka Bangladesh, kiba don tang 30 haduh 70 meter na ka kad liengsuiñ ha ki katto katne ki jaka, kiba la kynnoh ba ki thew ïa ki Laser Light ha ki liengsuiñ kiba wan shajan.
Katba ka jingtreikam jong ki liengsuiñ kam pat shah ktah namar ki kor ki bor kiba la pyntreikam hi, ka jingpynthut ka long ka jingeh kaba khraw ïa ki nongñiah liengsuiñ, khamtam ha ka por ba ki hiar miet.
Kane ka jingbishar bniah ïa ka jingshngaiñ ka wan hadien ka jingjia aksiden liengsuiñ kaba dang shen ha Ahmedabad, kaba la pynlong ïa ka jingpahara kaba jur ha kylleng ki kad liengsuiñ jong ka ri India.
Ki bor synshar shnong ki la pynthikna ba yn shim kloi ïa ki sienjam ban pynbeit khnang ban pynduna ïa ki jingma bad ban pynneh ïa ka jingtreikam jong ki liengsuiñ kaba shngaiñ.
